રાજસ્થાનના ઝાલાવાડમાં સરકારી શાળાની છત ધરાશાયી, 7 બાળકોના કરુણ મોત

રાજસ્થાનના ઝાલાવાડ જિલ્લામાં એક અત્યંત દુઃખદ ઘટના બની છે. મનોહરથાના બ્લોકના પીપલોડી ગામમાં આવેલી સરકારી ઉચ્ચ પ્રાથમિક શાળાની છત અચાનક તૂટી પડતાં ભારે અફરાતફરી મચી ગઈ હતી. આ દુર્ઘટનામાં અત્યાર સુધીમાં 7 માસૂમ બાળકોના કરુણ મોત થયા છે, જ્યારે 20થી વધુ બાળકો ઘાયલ થયા હોવાના અહેવાલ છે.

પ્રાથમિક માહિતી અનુસાર, શાળાની છત તૂટી પડ્યા બાદ તેની દીવાલ પણ ધરાશાયી થઈ હતી, જેના કારણે કાટમાળ નીચે અનેક બાળકો દટાઈ ગયા હતા. ઘટનાની જાણ થતાં જ સ્થાનિકો અને વહીવટી તંત્ર તાત્કાલિક રાહત અને બચાવ કાર્ય માટે ઘટનાસ્થળે પહોંચી ગયા હતા.

કાટમાળ હટાવવાની કામગીરી યુદ્ધના ધોરણે ચાલી રહી છે અને હજુ પણ કેટલાક બાળકો કાટમાળ નીચે ફસાયા હોવાની આશંકા છે, જેના કારણે મૃત્યુઆંક વધવાની ભીતિ સેવાઈ રહી છે.

આ દુર્ઘટના અંગે મુખ્યમંત્રી ભજનલાલ શર્માએ શોકની લાગણી વ્યક્ત કરી છે. તેમણે તાત્કાલિક ધોરણે આ ઘટનાની ઉચ્ચ સ્તરીય તપાસના આદેશ આપ્યા છે, જેથી દુર્ઘટનાના કારણો જાણી શકાય અને ભવિષ્યમાં આવા બનાવો ન બને તે માટે પગલાં લઈ શકાય. ઘાયલ બાળકોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે.

આ ઘટનાથી સમગ્ર ઝાલાવાડ જિલ્લામાં શોકનો માહોલ છવાઈ ગયો છે. માતા-પિતા અને વાલીઓમાં ભારે ચિંતા જોવા મળી રહી છે. સરકારી શાળાઓની ઈમારતોની ગુણવત્તા અને જાળવણી પર ગંભીર સવાલો ઉભા થયા છે. આશા છે કે આ તપાસ દ્વારા સત્ય બહાર આવશે અને જવાબદારો સામે કાર્યવાહી કરવામાં આવશે.

English summary

7 Children Killed in Rajasthan's Jhalawar School Roof Collapse, Over 20 Injured