હવે દિલ્હીમાં ડૉક્ટર્સની સુરક્ષા માટે બાઉન્સર્સ!
છેલ્લા કેટલાક સમયમાં દર્દીઓના સગાઓ દ્વારા ડૉક્ટર્સ પર કરવામાં આવેલા હૂમલાઓની ગંભીરતાને ધ્યાનમાં લેતા હોસ્પિટલ્સના વ્યવસ્થાપકોએ આ નવતર ઉકેલ શોધી કાઢ્યો છે. દિલ્હી સરકાર હસ્તકની હોસ્પિટલ્સના સત્તાવાળાઓએ બાઉન્સર્સ દ્વારા ફિલ્મ સ્ટાર્સની કરાતી સુરક્ષાનો વિચાર અપનાવી તેવી જ પ્રોફેશનલ સુરક્ષા ડૉક્ટર્સને માટે ઉપલબ્ધ કરાવી છે. આમ કરવાનો હેતુ ડૉક્ટર્સને દર્દીઓના સગાઓના ગંભીર હૂમલાઓથી બચાવી આ સમસ્યા મુદ્દે ડૉક્ટર્સને હડતાલ પર જતા રોકવાનો છે.
દીન દયાલ ઉપાધ્યાય હોસ્પિટલના મેડિકલ સુપરિટેન્ડન્ટ પ્રોમિલા ગુપ્તાનું કહેવું છે કે 'તેઓ બાઉન્સર્સ નથી પણ સ્પેશ્યલ સિક્યુરિટી ગાર્ડ્સ છે. આ માટે તેમને ઊંચો પગાર ચૂકવવામાં આવતો નથી. અમે હોસ્પિટલને સિક્યુરિટી ગાર્ડ્સ પૂરી પાડતી એજન્સીને આ પ્રકારની સુરક્ષા પ્રદાન કરવા જણાવ્યું હતું.' ઉલ્લેખનીય છે કે દિલ્હીના હાર્દમાં આવેલી હોસ્પિટલમાં ગયા વર્ષે દર્દીઓના સગાઓ દ્વારા ડૉક્ટર્સ પર કરવામાં આવેલા હૂમલાઓને પગલે તમામ ડૉક્ટર્સ હડતાલ પર ઉતર્યા હતા અને હોસ્પિટલની સારવાર સેવાને ભારે અસર પહોંચી હતી.