વડોદરાના હાલોલમાંથી મળી આવ્યુ ચીપ ફિટ કરેલુ શંકાસ્પદ કબૂતર

વડોદરામાં એક કંપનીના પરિસરમાંથી ચીપ ફિટ કરેલ એક કબૂતર શંકાસ્પદ સ્થિતિમાં મળી આવ્યુ.

Updated: Friday, May 7, 2021, 10:09 [IST]

વડોદરાઃ પંચમહાલ જિલ્લાના હાલોલ નજીક ગોપીપુરા ખાતે આવેલી એક કંપનીના પરિસરમાંથી ચીપ ફિટ કરેલ એક કબૂતર શંકાસ્પદ સ્થિતિમાં મળી આવ્યુ. કબૂતરના બે પગમાં વિદેશી ભાષાના લખાણ, કોડીંગ સાથેની રીંગ ઉપરાંત માઈક્રો ડિવાઈસ ચિપ લગાવેલી દેખાતા વનવિભાગના અધિકારીઓએ કબૂતર કબ્જે કરીને કાર્યવાહી શરૂ કરી હતી. વનવિભાગ, પોલિસ અને ગુજરાત પ્રાણી ક્રૂરતા નિવારણ સંસ્થાના સ્વયંસેવકોની ઉપસ્થિતિમાં વેટરનરી ડૉક્ટરે કબૂતરના પગમાંથી ડિવાઈસ અને રીંગ કાઢીને તપાસ માટે ગાંધીનગર, એફએસએલને મોકલી આપ્યુ હતુ.

ગુજરાત સોસાયટી ફૉર પ્રીવેન્શન ઑફ ક્રૂઅલ્ટી ટુ એનીમાલ્સ(GSPCA)ના ફાઉન્ડર રાજ ભાવસારે જણાવ્યુ કે, 'હાલના તબક્કે કબૂતરના પગમાં ટ્રેકિંગ ડિવાઈસ લગાવ્યુ હોય તેનુ શંકા કરી શકાય. એટલે કે એક પગમાં જીપીએસ અને બીજા પગમાં સ્કેનર લગાવેલુ હશે. પરંતુ વિદેશી ભાષામાં લખવામાં આવેલુ હોવાથી પોલિસ દ્વારા તેની તપાસ શરૂ કરી દેવામાં આવી છે. કોઈ જાસૂસીના ઈરાદે કબૂતર આવ્યુ છે કે શું તે વિશે પણ ખાતરી કરવાની જરૂર છે. હાલમાં તો ગરમીના કારણે કબૂતરની તબિયત બગડી હશે અથવા તો કોઈ ગીધ જેવુ પક્ષી તેને શિકાર કરવા આવ્યુ હશે એટલે તે ગભરાઈને પડી ગયુ હોય તેમ લાગે છે.'