પાકિસ્તાનમાં સંસદીય ચૂંટણી : કડક સુરક્ષા હેઠળ મતદાન
રાષ્ટ્રીય ધારાસભા તેમજ પ્રાંતિય વિધાનસભાઓની બેઠકો માટે કુલ 15,624 ઉમેદવારો ચૂંટણીના મેદાનમાં ઉતર્યા છે. આમાં 1000 જેટલા અપક્ષ ઉમેદવારો છે. પાકિસ્તાનના માહિતી પ્રધાન આરીફ નિઝામીએ કહ્યું છે કે આ વખતની ચૂંટણી જરાય સામાન્ય પ્રકારની નથી. આ પાકિસ્તાનના અસ્તિત્વ માટેની લડાઈ છે. આ વખતે પહેલી જ વાર ચૂંટણી પંચને સ્વતંત્ર સત્તા આપવામાં આવી છે. ચૂંટણી મુક્ત, ન્યાયી અને પારદર્શી વાતાવરણમાં યોજાય એવી આશા છે.
તાલીબાનની ધમકી અને હિંસાચાર વચ્ચે આ ચૂંટણી યોજાઈ રહી છે. સરકારે આજે મતદાનના દિવસે સુરક્ષા બંદોબસ્ત જળવાઈ રહે તે માટે 6 લાખ સુરક્ષા જવાનોને તહેનાત કર્યા છે. મતદારો નેતાઓથી નારાજ છે, પણ વિકલ્પ પણ સીમિત છે. દેશના ઈતિહાસમાં 66 વર્ષમાં પહેલી જ વાર કોઈ લોકશાહી સરકારે પોતાની મુદત પૂરી કરી છે.
પ્રમુખ આસીફ અલી ઝરદારીની પાકિસ્તાન પીપલ્સ પાર્ટી, ભૂતપૂર્વ વડા પ્રધાન નવાઝ શરીફની મુસ્લિમ લીગ અને ક્રિકેટરમાંથી નેતા બનેલા ઈમરાન ખાનની તેહરીક-એ-ઈન્સાફ પાર્ટી વચ્ચે મુખ્ય જંગ છે. રવિવાર સુધીમાં ચિત્ર સ્પષ્ટ થઈ જશે કે પાકિસ્તાનમાં નવી સરકાર કોની બનશે. પાકિસ્તાનની આ ચૂંટણી પર ભારતની પણ બાજ નજર છે.