અમેરિકામાં ગુરુદ્વારા બહાર વૃદ્ધ શીખ પર હુમલો, હાલત ગંભીર
કેલીફોર્નિયાના ફ્રેસનો શહેરમાં એક ગુરુદ્વારા બહાર 82 વર્ષિય પિયારા સિંહ પર હુમલો કરવામાં આવ્યો. આ શહેરમાં શીખ અથવા પંજાબી સમુદાયના લોકો મોટી સંખ્યામા રહે છે. ફ્રેસનો શહેરની પોલીસ પ્રમુખ જેરી ડ્યેરે ગુરુદ્વારામાં એકત્ર થયેલા શીખોને જણાવ્યું કે આ અપરાધના સંદિગ્ધ આરોપીની ઓળખ ગિલબર્ટ ગારશિયાના રૂપમાં થઇ છે. તેણે લોંખડના સળિયાથી પિયારા સિંહ પર હુમલો કર્યો, જે ગુરુદ્વારામાં એક સ્વયંસેવી તરીકે કામ કરે છે.
પિયારા સિંહ પર હુમલો રવિવારના દિવસે ગુરુદ્વારા બહાર થયો. હજુ પણ બેભાન અવસ્થામાં રહેલા સિંહને 20 ટાકા આવ્યા છે, તેમના હાડકા અને પાસળી તૂટી ગઇ છે. તેમની હાલતમાં થોડોક સુધારો આવી રહ્યો છે. મોડી સાંજે ડ્યેરના નેતૃત્વમાં એફબીઆઇ અને ન્યાયિક વિભાગના પ્રતિનિધિ સહિત સરકારી અધિકારીઓના દળે શીખ સમુદાયના સભ્યોની મુલાકાત કરી અને તેમને આશ્વાસન આપ્યું કે આવા અપરાધોથી તેમને બચાવવા માટે પર્યાપ્ત ઉપાય કરવામાં આવી રહ્યાં છે.