સ્વાદથી ભરપૂર અને પૌષ્ટિક પાલક કઢી આ રીતે બનાવશો તો બધા તમારા વખાણ કરશે

સ્વાદ અને પોષણથી ભરપૂર શિયાળામાં સહુની મનપસંદ પાલક કઢી આ રીતે બનાવો. ફટાફટ બની જશે.

Palak Kadhi: ખીચડી કે બાજરીના રોટલા સાથે કઢી મારુ તો પ્રિય ભોજન છે. એમાંય જો કઢી પાલકની હોય તો પૂછવુ જ શું. આજની આ રેસિપી કંઈક આવી જ છે. સ્વાદનો ખજાનો અને પોષણથી ભરપૂર પાલકની કઢીમાં ખૂબ જ આયર્ન અને મિનરલ્સ હોય છે. પાલકની કઢીને સવારે બાજરીના રોટલા કે ભાત સાથે, ડિનરમાં ખીચડી સાથે પીરસી શકાય છે. આને બનાવવાની આ રીત એટલી સરળ છે કે નાના છોકરાઓ પણ બનાવી લેશે. તો આવો જાણીએ આ સરળ રીત.

4 સભ્યો માટે

તૈયારીનો સમય -15 મિનિટ
બનાવવાનો સમય - 20 મિનિટ

સામગ્રી

• પાલકના પાન - 30-35
• ખાટુ દહીં - 1 કપ
• ચણાનો લોટ - 2 ચમચી
• તેલ - 2 ચમચી
• લીલા મરચાં - 2-3
• આદુ - 1 ઇંચનો ટુકડો
• સૂકા લાલ મરચાં - 4-5
• ડુંગળી - 1
• જીરુ - 1 ચમચી
• મીઠુ - સ્વાદ મુજબ
• હળદર પાવડર - એક ચપટી

પાલકની કઢી બનાવવાની રીત

• સૌ પ્રથમ ચણાનો લોટ, દહીં અને બે કપ પાણીને બરાબર હલાવી લો.
• ત્યારબાદ એક નૉન સ્ટિક પેનમાં તેલ ગરમ કરો.
• પછી લીલા મરચાં, 10-12 પાલકના પાન અને આદુને થોડુ પાણી ઉમેરીને પીસી લો.
• આ મિશ્રણને દહીંના બાઉલમાં મિક્સ કરો.
• હવે ગરમ તેલમાં લાલ મરચુ નાખીને સાંતળી લો.
• તે પછી ડુંગળીને ક્યુબ્સમાં કાપીને પેનમાં મૂકો.
• આ સાથે રાઈ અને જીરુ ઉમેરો અને ડુંગળી સાથે સાંતળો.
• ડુંગળી નરમ થાય એટલે તેમાં દહીંનુ મિશ્રણ, મીઠુ અને હળદર ઉમેરો.
• કઢી ઘટ્ટ થવા લાગે ત્યાં સુધી તેને મધ્યમ તાપ પર હલાવતા રહો.
• ત્યાર બાદ બાકીની પાલકને બારીક સમારી લો અને તેને કઢીમાં જ મિક્સ કરી દો.
• કઢીને થોડીવાર થવા દો અને પછી ગેસ બંધ કરી દો.
• તેને ગરમા-ગરમ ભાત, બાજરીના રોટલા કે ખીચડી સાથે સર્વ કરો.

English summary

Tasty and nutritious palak kadhi simple recipe