WPL 2023: લોકપ્રિય થઇ રહી છે વિમેન્સ પ્રિમિયર લીગ, BCCI કમાઇ ચુક્યું છે 5 હજાર કરોડ
વિમેન્સ પ્રીમિયર લીગમાં કુલ 5 ટીમો ભાગ લઈ રહી છે. 4 માર્ચથી શરૂ થયેલી આ આકર્ષક રમત સ્પર્ધામાં કુલ 87 ખેલાડીઓને પાંચ ટીમોએ ઊંચી બોલી લગાવીને ખરીદ્યા છે.
ઈન્ડિયન પ્રીમિયર લીગ એટલે કે આઈપીએલનું નામ સાંભળતા જ ચોગ્ગા અને છગ્ગાની યાદ તાજી થઈ જાય છે. તે જ તર્જ પર, BCCIએ મહિલાઓમાં ક્રિકેટના વધતા ચલણને ધ્યાનમાં રાખીને મહિલા ખેલાડીઓ માટે IPL શરૂ કરવાનો નિર્ણય કર્યો. તેને વિમેન્સ પ્રીમિયર લીગ (WPL) નામ આપવામાં આવ્યું છે.
મહિલા IPLની પ્રથમ સિઝન વર્ષ 2023માં શરૂ થઈ ગઈ છે. આ માટે આઈપીએલની જેમ જ મહિલા ક્રિકેટ ખેલાડીઓની હરાજીનું આયોજન કરવામાં આવ્યું હતું. જેમાં 5 ટીમોએ કુલ 87 ખેલાડીઓને ખરીદ્યા હતા. મહત્વપૂર્ણ છે કે, BCCIને મહિલા પ્રીમિયર લીગ માટે ટીમોની હરાજીમાં 4669.99 કરોડ રૂપિયા મળ્યા છે. 25 જાન્યુઆરી 2023ના રોજ ખુદ જય શાહે ટ્વીટ કરીને આ જાણકારી આપી હતી.
સૌથી મોંઘી છે અદાણી ગ્રુપની ટીમ
વિમેન્સ પ્રીમિયર લીગમાં અમદાવાદની ગુજરાત જાયન્ટ્સની ટીમે સૌથી વધુ બોલી લગાવી છે. આ બિડ અદાણી ગ્રુપ દ્વારા મૂકવામાં આવી છે. અદાણી ગ્રુપે આ ટીમને લગભગ રૂ. 1289 કરોડની બોલી લગાવીને ખરીદી છે. જ્યારે મુંબઈ ઈન્ડિયન્સને રિલાયન્સ ગ્રુપની ઈન્ડિયાવિન સ્પોર્ટ્સ પ્રાઈવેટ લિમિટેડે રૂ. 912.99 કરોડમાં ખરીદ્યું છે. લિકર કંપની ડિયાજીઓએ રોયલ ચેલેન્જર્સ બેંગ્લોર માટે 901 કરોડ રૂપિયાની બોલી લગાવી છે. જ્યારે JSW અને GMR ગ્રૂપે મળીને દિલ્હી કેપિટલ્સ ટીમને રૂ. 810 કરોડમાં ખરીદી હતી અને કેપ્રી ગ્લોબલે રૂ. 757 કરોડની બોલી સાથે લખનૌની યુપી વોરિયર્સ ટીમને ખરીદી હતી.
સ્મૃતિ મંધાના સૌથી મોંઘી ખેલાડી
હરાજીમાં સૌથી વધુ બોલી મેળવનાર મહિલા ક્રિકેટરનું નામ સ્મૃતિ મંધાના છે. આરસીબીએ તેને 3.40 કરોડ આપીને પોતાની ટીમમાં સામેલ કર્યો હતો. સ્મૃતિ મંધાનાએ 2017માં મહિલા ક્રિકેટ વર્લ્ડ કપમાં પણ બે સદી ફટકારી હતી. બીજા નંબરે ઓસ્ટ્રેલિયાના એશ્લે ગાર્ડનરને ગુજરાત જાયન્ટ્સે રૂ. 3.20 કરોડમાં ટીમમાં સામેલ કર્યો હતો. મોંઘા ખેલાડીઓની યાદીમાં ઈંગ્લેન્ડની નતાલી સાયવર ત્રીજા નંબર પર છે. તેને મુંબઈ ઈન્ડિયન્સે 3.20 કરોડ રૂપિયા આપ્યા છે. ચોથા નંબર પર ભારતીય મહિલા ટીમની ઓલરાઉન્ડર ખેલાડી દીપ્તિ શર્મા છે. યુપી વોરિયર્સે તેને 2.60 કરોડ રૂપિયામાં પોતાની ટીમમાં સામેલ કર્યો છે.
BCCIની ટીમોને ચેતવણી
BCCI મહિલા IPLમાં વધુ તકેદારી રાખી રહ્યું છે. આ માટે BCCIએ તમામ 5 ટીમોને ચેતવણી આપી છે. હકીકતમાં, બીસીસીઆઈ કહે છે કે ટીમો ફેન્ટસી રમત સાથે વ્યવસાયિક જોડાણમાં પ્રવેશ કરી શકે છે. પરંતુ ક્રિપ્ટોકરન્સી, સટ્ટાબાજી, જુગાર, વાસ્તવિક નાણાં અને તમાકુ જેવા ક્ષેત્રોમાં સામેલ થવાથી દૂર રહો. આ સિવાય બીસીસીઆઈએ તમામ ફ્રેન્ચાઈઝીઓને એમ પણ કહ્યું કે જો કોઈ ફ્રેન્ચાઈઝી પોતાને પ્રતિબંધિત બ્રાન્ડ સાથે જોડવાનો પ્રયાસ કરશે તો તેની સામે કડક કાર્યવાહી થઈ શકે છે. એટલું જ નહીં તેની પાસેથી ટીમના અધિકારો પણ છીનવી શકાય છે.
Click it and Unblock the Notifications
Sign in with Google
