મોહાલી ટેસ્ટ: કાંગારુઓનો 'શિકાર' કર્યો ભારતના સાવજોએ, જુઓ તસવીરો

| Updated: Monday, March 18, 2013, 17:19 [IST]

મોહાલી ખાતે રમાયેલી ટેસ્ટમાં ઓસ્ટ્રેલિયાને છ વિકેટથી પરાજય આપીને ભારતે શ્રેણી 3-0થી પોતાના નામે કરી લીધી છે. આ સાથે જ ભારતે ઓસ્ટ્રેલિયા સામે સળંગ ત્રણ ટેસ્ટ મેચ જીતી છે. હજુ એક ટેસ્ટ દિલ્હી ખાતે રમવાની છે, જો આ ટેસ્ટ પણ ભારત જીતી જશે તો ઓસ્ટ્રેલિયાને ક્લિનસ્વીપ આપવામાં ભારત સફળ થશે. મોહાલી ખાતેની ટેસ્ટ ભારતે જીતતાની સાથે જ અત્યરસુધીમાં ઓસ્ટ્રેલિયાને મળેલો સૌથી મોટો પરાજય છે. છેલ્લા 30 વર્ષ બાદ ઓસ્ટ્રેલિયા આ પ્રકારે હાર્યું છે. શાનદાર 187 રનની ઇનિંગ બદલ શિખર ધવનને મેન ઓફ ધ મેચ જાહેર કરવામાં આવ્યો હતો.

અત્રે નોંધનીય છે કે, ભારતમાં વિરેન્દ્ર સેહવાગ અને ગૌતમ ગંભીર જેવા અનુભવી ખેલાડી નહીં હોવા છતાં પણ ભારતે યુવા ખેલાડીઓના જુસ્સા અને જોમની મદદથી ઓસ્ટ્રેલિયા સામે ટેસ્ટ શ્રેણી જીતીને સાબિત કરી આપ્યું છે કે હવે નવી ટીમ ઇન્ડિયા તૈયાર થઇ ગઇ છે. મોહાલી ખાતેની ટેસ્ટની વાત કરીએ તો વરસાદના કારણે પહેલા દિવસની રમત રમાઇ નહોતી. ચાર દિવસ રમાયેલી આ ટેસ્ટમાં ભારતે છ વિકેટથી આ ટેસ્ટ મેચ જીતી લીધી છે.

પ્રથમ બેટિંગ કરતા ઓસ્ટ્રેલિયાએ પ્રથમ ઇનિંગમાં 408 અને બીજી ઇનિંગમાં 233 રન બનાવ્યા હતા. જેના જવાબમાં ભારતે પ્રથમ ઇંનિગમાં 499 અને બીજી ઇનિંગમાં 136 રન ચાર વિકેટ ગુમાવીને આ મોહાલી ટેસ્ટ પોતાના નામે કરી દીધી હતી. મોહાલી ટેસ્ટમાં ભારત તરફથી શિખર ધવને શાનદાર 187 અને મુરલી વિજયે 153 રનની ઇનિંગ રમી હતી. જ્યારે ધોનીએ 67 રનની ઇનિંગ રમી હતી. બોલરની વાત કરીએ તો આ ટેસ્ટમાં ઇશાંત શર્માએ ત્રણ, રવિન્દ્ર જાડેજાએ બન્ને ઇનિંગમા ત્રણ-ત્રણ વિકેટ, ભુવનેશ્વર કુમારે ત્રણ વિકેટ અને ઓઝા-અશ્વિને બન્ને ઇનિંગમાં બે-બે વિકેટ મેળવી છે.