સચિનની ચેતવણી, દક્ષિણ આફ્રિકાને હળવાશથી ના લેવું જોઇએ

નવી દિલ્હી, 20 ફેબ્રુઆરી: પાકિસ્તાનને હરાવ્યા બાદ ટીમ ઇન્ડિયા હાલમાં ઘણી ઉત્સાહિત છે, પરંતુ આ ઉત્સાહ તેને નેક્સ્ટ મેચમાં ભારે પણ પડી શકે છે. જેના માટે માસ્ટર બ્લાસ્ટર સચિન તેંડુલકરે ટીમ ઇન્ડિયાને વોર્નિંગ પણ આપી છે કે તેઓ દક્ષિણ આફ્રિકાને હળવાશથી ના લે.

વિશ્વકપના પ્રબળ દાવેદારમાંથી એક સાઉથ આફ્રિકાની સાથે ભારતનો મુકાબલો આ રવિવારે થવાનો છે. એટલા માટે સચિને ટીમ ઇન્ડિયાને જણાવ્યું છે કે તેમણે ઝડપી બોલર ડેલ સ્ટેનનું વિશેષ ધ્યાન રાખવું પડશે.

બેટ્સમેનોને બેટિંગ ટિપ્સ આપતા સચિન તેંડુલકરે જણાવ્યું કે 'સ્ટેનને કેવી રીતે રમશો એ આપ પહેલાથી ના વિચારી શકો. સ્ટેન પણ ક્યારેક ખરાબ ફોર્મમાં રહે છે, પરંતુ તે અંગેનો નિર્ણય તમારે ત્યારે જ લેવો પડશે, અને ઓછામાં ઓછું સ્ટેનની બોલિંગને સન્માન તો આપવું જ પડશે.'

જોકે તેંડુલકરે ભારતીય બેટિંગ પર પૂરેપૂરો વિશ્વાસ દર્શાવતા જણાવ્યું કે તેમને વિરાટ કોહલી, અજિંક્ય રહાણે અને સુરેશ રૈનામાં પૂરેપૂરો વિશ્વાસ છે. સાથે જ તેંડુલકરે બેટિંગ ક્રમમાં પણ છેડછાડ નહીં કરવાની પણ સલાહ આપી છે. તેમણે જણાવ્યું કે 'હું હાલનો જે બેટિંગ ક્રમ છે તેને જ યથાવત રાખવા માંગીશ, એવામાં જો ઘણી વિકેટ પડી જાય તો હું રહાણેને રૈના કરતા આગળ ચોથા ક્રમે બેટિંગ કરવા બોલાવવા માંગીશ. શરૂઆતની ચાર ઓવરમાં હું રૈનાને ક્રિઝ પર જોવાનું પસંદ નહીં કરું.'

English summary

Sachin Tendulkar has warned Team India not to get complacent against South Africa, who are a far better side than Pakistan. India started their World Cup campaign on a winning-note by defeating the arch-rivals Pakistan by 76 runs on Sunday.