ખેત તલાવડી બનાવવા ઈચ્છતા ખેડૂતો માટે મોટા સમાચાર, સરકાર મફત આપશે આ વસ્તુ

By Desk

Updated: Monday, March 30, 2026, 20:43 [IST]

ગુજરાત રાજ્યમાં ખેત તલાવડીઓમાં જીઓમેમ્બ્રેન (તળપત્રી) લગાવવા માટે નવી યોજના અમલમાં મૂકવામાં આવી છે. આ યોજના હેઠળ ખેડૂતોએ ઓનલાઈન અરજી કરવાની રહેશે અને ખર્ચ સરકાર દ્વારા વહન કરવામાં આવશે.

પાણીની અછત ધરાવતા વિસ્તારોમાં ખેતી માટે સિંચાઈની વ્યવસ્થા ઉભી કરવાના હેતુથી આ નિર્ણય લેવાયો છે. ખેડૂતોએ પોતાના ખર્ચે બનાવેલી તલાવડીઓમાં જ આ જીઓમેમ્બ્રેન ફીટ કરી આપવામાં આવશે.

વરસાદી પાણીના સંગ્રહ માટે આ જીઓમેમ્બ્રેન ટેકનોલોજી અત્યંત ઉપયોગી સાબિત થઈ શકે તેમ છે. આ સંગ્રહિત પાણીનો ઉપયોગ ખરીફ કે રવિ પાકની પૂરક સિંચાઈ માટે ભવિષ્યમાં કરી શકાશે.

સિંચાઈ વિભાગના જણાવ્યા મુજબ, રાજ્યના તમામ જિલ્લાના ખેડૂત ખાતેદારો આ યોજનાનો લાભ લઈ શકશે. જોકે, આ માટે ખેત તલાવડીનું ખોદકામ ખેડૂતે અગાઉથી સ્વખર્ચે કરેલું હોવું જોઈએ.

આ યોજના માટેની ઓનલાઈન અરજીઓ ૩૦ માર્ચથી શરૂ થઈને ૧૫ મે, ૨૦૨૬ સુધી સ્વીકારવામાં આવશે. ખેડૂતોએ સત્તાવાર પોર્ટલ g-talavadi.gujarat.gov.in પર જઈને નોંધણી કરાવવાની રહેશે.

અરજીઓની ચકાસણી કર્યા બાદ દરેક તાલુકા માટે નક્કી કરેલી મર્યાદા મુજબ ઓનલાઈન ડ્રો કરવામાં આવશે. ત્યારબાદ જ પસંદ થયેલા ખેડૂતોના ખેતરમાં ફિલ્ડ વેરીફિકેશન હાથ ધરવામાં આવશે.

સમગ્ર પ્રક્રિયા પારદર્શક રહે તે માટે અરજીથી લઈને પસંદગી સુધીની કાર્યવાહી ઓનલાઈન કરવામાં આવી છે. પસંદ થયેલા અરજદારોને મોબાઈલ પર એસએમએસ (SMS) દ્વારા જાણ કરવામાં આવશે.

યોજનાના નિયમ મુજબ ખેત તલાવડીનું મહત્તમ કદ ૪૦ મીટર x ૪૦ મીટર અને ૬ મીટર ઊંડાઈ હોવી જોઈએ. સરકાર વધુમાં વધુ ૨૪૬૦ ચોરસ મીટર જીઓમેમ્બ્રેન ફીટ કરી આપશે.

જો ખેત તલાવડીનું કદ નિર્ધારિત મર્યાદા કરતા મોટું હશે, તો વધારાનું જીઓમેમ્બ્રેન ખેડૂતે ખર્ચવું પડશે. આ કામગીરી સિંચાઈ વિભાગ દ્વારા નક્કી કરેલા કોન્ટ્રાક્ટર મારફતે જ કરવામાં આવશે.

અરજી કરવા માટે ખેડૂતના આધાર કાર્ડની નકલ, ૭/૧૨ અને ૮-અ ના ઉતારા જેવા દસ્તાવેજોની જરૂર પડશે. સાથે જ તલાવડીની સાફસફાઈ અને જાળવણી માટેનું બાંહેધરી પત્રક પણ આપવું પડશે.

જીઓમેમ્બ્રેન ફીટ થયા બાદ તેની કાળજી રાખવાની સંપૂર્ણ જવાબદારી જે તે ખેડૂત લાભાર્થીની રહેશે. ખેડૂતોએ અરજી કરતા પહેલા વેબસાઈટ પર આપેલી તમામ માર્ગદર્શિકા વાંચી લેવી અનિવાર્ય છે.

વધારે વિગતો અને ઓનલાઈન અરજી માટે વિભાગની સત્તાવાર વેબસાઈટનો ઉપયોગ કરવા જણાવાયું છે. આ યોજનાથી ખેતરોમાં પાણી સંગ્રહવાની ક્ષમતામાં વધારો થવાની સંભાવના જોવામાં આવી રહી છે.