ગુજરાતમાં ખરીફ પાકોનું રેકોર્ડબ્રેક વાવેતર, મગફળીએ રેકોર્ડ તોડ્યો

આ વર્ષે ગુજરાતમાં થયેલા મબલખ અને સમયસરના વરસાદને કારણે ખેડૂતોમાં ખુશીનો માહોલ છે. ચોમાસાની મહેરથી રાજ્યમાં ખરીફ પાકોનું વિક્રમી વાવેતર નોંધાયું છે.

અત્યાર સુધીમાં રાજ્યમાં કુલ ૮૫ ટકાથી વધુ વરસાદ થઈ ચૂક્યો છે, જેના પરિણામે ૮૧ લાખ હેક્ટરથી પણ વધુ વિસ્તારમાં ખેતી થઈ છે, જે કુલ લક્ષ્યાંકના ૯૪ ટકા જેટલું છે. જો વરસાદનું જોર આમ જ જળવાઈ રહેશે તો આગામી પંદર દિવસમાં વાવેતર ૧૦૦ ટકાને પાર થવાની પૂરી શક્યતા છે.

ગુજરાત મગફળી અને કપાસના ઉત્પાદનમાં દેશભરમાં અગ્રેસર છે. આ વર્ષે પણ ખેડૂતોએ સૌથી વધુ વાવેતર આ બે પાકોનું જ કર્યું છે. આ આંકડાઓ ખરેખર પ્રશંસનીય છે.

• મગફળી : લગભગ ૨૧.૮૮ લાખ હેક્ટર વિસ્તારમાં મગફળીનું વાવેતર થયું છે. સામાન્ય રીતે રાજ્યમાં ૧૭.૫૦ લાખ હેક્ટર વાવેતરની સરખામણીએ આ વર્ષે ૧૨૫ ટકા વાવેતર થયું છે, જે એક નવો રેકોર્ડ છે.
• કપાસ: ૨૦.૭૧ લાખ હેક્ટરથી વધુ જમીનમાં કપાસનું વાવેતર થયું છે.

ફક્ત મગફળી અને કપાસ જ નહીં પરંતુ અન્ય પાકોનું વાવેતર પણ નોંધપાત્ર રીતે વધ્યું છે.

• તેલીબિયાં પાકો: કુલ ૩૦.૪૬ લાખ હેક્ટર વિસ્તારમાં વાવેતર થયું છે, જે ગયા વર્ષના ૨૭.૬૯ લાખ હેક્ટર કરતાં ઘણું વધારે છે.
• ધાન્ય પાકો: ૧૩.૫૭ લાખ હેક્ટરથી વધુ વિસ્તારમાં ધાન્ય પાકોનું વાવેતર નોંધાયું છે.
• કઠોળ પાકો: ૪.૧૩ લાખ હેક્ટરથી વધુ જમીનમાં કઠોળનું વાવેતર થયું છે.
• ઘાસચારો: પશુધન માટે ઘાસચારાનું વાવેતર પણ ૮.૯૨ લાખ હેક્ટરથી વધુ વિસ્તારમાં થયું છે.
• શાકભાજી: ૨.૪૯ લાખ હેક્ટરથી વધુ વિસ્તારમાં શાકભાજીનું વાવેતર થયું છે.

ખેતી નિયામકની કચેરીના રિપોર્ટ મુજબ, આ વર્ષે મગફળી, તુવેર, સોયાબીન, ડાંગર, અને મઠ જેવા પાકોનું વાવેતર છેલ્લા ત્રણ વર્ષની સરેરાશ કરતાં ૧૦૦ ટકાને પાર થઈ ગયું છે.

આ ઉપરાંત, બાજરી, મકાઈ અને શાકભાજી જેવા પાકોનું વાવેતર પણ ૯૦ ટકાથી વધુ નોંધાયું છે. આ આંકડાઓ દર્શાવે છે કે આ વર્ષે ગુજરાતના ખેડૂતો માટે ખરીફ પાકનું ઉત્પાદન ઘણું સારું રહેવાની શક્યતા છે.

English summary

Gujarat Kharif Crops: Record-Breaking Sowing, Groundnut Leads the Way