FIIની વેચાવલી વચ્ચે ભારતીય શેર માર્કેટમાં ભારે કડાકો, પ્રથમ 15 મિનિટમાં 5.15 લાખ કરોડ સ્વાહા

INDIAN STOCK MARKET: દિવાળીના મૂહુર્ત ટ્રેડિંગમાં થોડા સુધારા મળ્યા બાદ સોમવારે એટલે કે આજે ભારતીય શેર માર્કેટમાં વેચાવલીનું ભારે પ્રેશર જોવા મળી રહ્યું છે, ભારતીય શેરબજારના બંને મુખ્ય સૂચકાંકો - સેન્સેક્સ અને નિફ્ટી સોમવારે ભારે નુકસાન સાથે ખુલ્યા હતા.

વાસ્તવમાં રોકાણકારો યુએસ પ્રમુખપદની ચૂંટણી અને ફેડરલ રિઝર્વના વ્યાજ દરના નિર્ણયો પહેલા ખૂબ જ સાવધ અભિગમ અપનાવી રહ્યા છે. તે જ સમયે દેશની સૌથી મૂલ્યવાન કંપની રિલાયન્સ ઇન્ડસ્ટ્રીઝના શેરમાં ભારે ઘટાડાથી બજારનું વાતાવરણ બગડ્યું હતું. સાથે સાથે, વિદેશી રોકાણકારો દ્વારા સતત વેચવાલીને કારણે પણ બજારમાં પ્રેશર જોવા મળી રહ્યું છે.

સેન્સેક્સ-નિફ્ટીમાં ભારે ઘટાડો

BSE સેન્સેક્સ શરૂઆતના કારોબારમાં 665.27 પોઇન્ટ ઘટીને 79,058.85 થયો હતો. NSE નિફ્ટી 229.4 પોઈન્ટ ઘટીને 24,074.95 પર બંધ થયો હતો. આ કારણે રોકાણકારોને પ્રથમ 15 મિનિટમાં 5.15 લાખ કરોડ રૂપિયાનું નુકસાન થયું હતું.

30 શેરના સેન્સેક્સ પેકમાં સન ફાર્મા, રિલાયન્સ ઇન્ડસ્ટ્રીઝ, ઇન્ફોસિસ, ટાટા મોટર્સ, ઇન્ફોસિસ, ટાઇટન, મારુતિ અને NTPC સૌથી વધુ ઘટ્યા હતા. જ્યારે મહિન્દ્રા એન્ડ મહિન્દ્રા, ટેક મહિન્દ્રા, એચસીએલ ટેક્નોલોજીસ અને ઇન્ડસઇન્ડ બેંકમાં તેજી જોવા મળી હતી.

સવારે 10.15 વાગ્યા સુધીમાં સેન્સેક્સ અને નિફ્ટી બંને 1% કરતા વધુ ઘટી ગયા હતા. BSE સેન્સેક્સ 1054.78 પોઈન્ટ અથવા 1.32 ટકાના ઘટાડા સાથે 78,669.34 ના સ્તર પર ટ્રેડ કરી રહ્યો હતો. તે જ સમયે નિફ્ટીમાં પણ જોરદાર ઘટાડો જોવા મળ્યો હતો. નિફ્ટી 327.20 અથવા 1.35 ટકા ઘટીને 23,977.15ના સ્તરે ટ્રેડ થઈ રહ્યો હતો. રિલાયન્સ ઈન્ડસ્ટ્રીઝનો શેર 3.30 ટકાના ઘટાડા સાથે રૂ. 1,294.50 પર ટ્રેડ થઈ રહ્યો હતો.

વિદેશી રોકાણકારો દ્વારા વેચાણ એક્સચેન્જ ડેટા અનુસાર, વિદેશી સંસ્થાકીય રોકાણકારો (FII) એ શુક્રવારે રૂ. 211.93 કરોડના શેરનું વેચાણ કર્યું હતું. વિદેશી રોકાણકારોએ ઓક્ટોબરમાં ભારતીય શેરબજારમાંથી રૂ. 94,000 કરોડ (લગભગ $11.2 બિલિયન)નો જંગી વેચાણ કર્યું છે.

આ વેચાણને કારણે ઓક્ટોબર મહિનો અત્યાર સુધીનો સૌથી ખરાબ મહિનો બન્યો. સ્થાનિક ઇક્વિટીના ઊંચા મૂલ્યાંકન અને ચાઇનીઝ શેરોના આકર્ષક મૂલ્યાંકનના કારણે વિદેશી રોકાણકારો વેચવાલી કરી રહ્યા છે.

એશિયાના અન્ય બજારોની વાત કરીએ તો સિયોલ, શાંઘાઈ અને હોંગકોંગમાં ઉછાળો જોવા મળ્યો હતો. શુક્રવારે અમેરિકન બજારો લીલા નિશાનમાં બંધ થયા હતા. ગ્લોબલ ઓઇલ બેન્ચમાર્ક બ્રેન્ટ ક્રૂડ 1.49 ટકા વધીને $74.19 પ્રતિ બેરલ થયું છે. ઈઝરાયેલ-ઈરાન તણાવ અને અન્ય ભૌગોલિક રાજકીય પરિબળોને કારણે ક્રૂડ ઓઈલના ભાવ અસ્થિર રહે છે.

BSE અને NSEએ 1 નવેમ્બરના રોજ દિવાળીના અવસરે ખાસ એક કલાકના 'મુહૂર્ત ટ્રેડિંગ' સત્રનું આયોજન કર્યું હતું. તે નવા સંવત 2081 ની શરૂઆત દર્શાવે છે. શુક્રવારે ખાસ મુહૂર્ત ટ્રેડિંગ સેશનમાં BSE બેન્ચમાર્ક 335.06 પોઈન્ટ અથવા 0.42 ટકા વધીને 79,724.12 પર બંધ થયો હતો. નિફ્ટી 99 પોઈન્ટ અથવા 0.41 ટકા વધીને 24,304.35 પર પહોંચ્યો હતો.