Shortest war in history : ક્યાં લડાયુ હતું દુનિયાનું સૌથી નાનું યુદ્ધ? જાણો કેટલો સમય ચાલ્યુ હતુ?
Shortest war in history : જ્યાં દુનિયામાં વર્ષો સુધી ચાલેલા લાંબા યુદ્ધોનો ઇતિહાસ છે ત્યાં એક એવું યુદ્ધ પણ નોંધાયેલું છે જે ફક્ત 38 મિનિટમાં પૂરું થઈ ગયું હતું.
ઇતિહાસમાં ઘણાં યુદ્ધો એવા જોવા મળે છે જે લાંબા સમય સુધી ચાલ્યા અને તેમનાથી ભારે વિનાશ થયો. પ્રથમ અને દ્વિતીય વિશ્વ યુદ્ધ જેવા યુદ્ધો ચારથી છ વર્ષ સુધી ચાલ્યા હતા.
પરંતુ એક યુદ્ધ એવું પણ છે જે માત્ર 38 મિનિટમાં સમાપ્ત થઈ ગયું. આ યુદ્ધ 27 ઓગસ્ટ 1896ના રોજ બ્રિટન અને ઝાંઝીબાર (આજે તે તાન્ઝાનિયાનો ભાગ છે) વચ્ચે લડાયું હતું.
આ યુદ્ધનું મૂળ કારણ રાજકીય વિવાદ હતું. 1893માં બ્રિટિશ સરકારે ઝાંઝીબારનું સંચાલન કરવા માટે સૈયદ હમદ બિન થુવૈનીની નિમણૂક કરી હતી.
તેમણે શાંતિપૂર્ણ રીતે શાસન કર્યું પરંતુ 25 ઓગસ્ટ 1896ના રોજ તેમનું અવસાન થયું. હમદના મૃત્યુ બાદ તેમના ભત્રીજા ખાલિદ બિન બરગશે પોતાને ઝાંઝીબારના સુલતાન તરીકે જાહેર કર્યા.
આ વાત બ્રિટનને પસંદ ન પડી, કારણ કે ઝાંઝીબાર પર તેમનું નિયંત્રણ હતું. બ્રિટિશ સરકાર ઇચ્છતી હતી કે હમદનો પિતરાઈ ભાઈ હમુદ બિન મોહમ્મદને સુલતાન બનાવવામાં આવે. બ્રિટને ખાલિદને સુલતાન પદ છોડવાનો આદેશ આપ્યો, પરંતુ ખાલિદે આ આદેશનો અસ્વીકાર કર્યો અને પોતાના મહેલની આસપાસ લગભગ 3000 સૈનિકો તૈનાત કર્યા.
ખાલિદના આ વલણથી બ્રિટન નારાજ થયું અને તેણે ખાલિદને ચેતવણી આપી. જો કે, ખાલિદે આ ચેતવણીને અવગણી. આખરે 27 ઓગસ્ટે બ્રિટિશ સેનાએ ઝાંઝીબાર પર હુમલો કર્યો. યુદ્ધ શરૂ થયું અને ખાલિદની સેનાએ માત્ર 38 મિનિટમાં હાર સ્વીકારી લીધી. આ હુમલામાં ખાલિદના લગભગ 500 સૈનિકો માર્યા ગયા.
આ યુદ્ધ દુનિયાના ઇતિહાસમાં સૌથી ટૂંકા યુદ્ધ તરીકે નોંધાયું છે, જે રાજકીય વિવાદ અને બ્રિટિશ સેનાની શક્તિનું પ્રતીક બની રહ્યું.
Click it and Unblock the Notifications
Sign in with Google
