ભુતાવળ હોટેલમાં રાત પસાર કરવાની ચૅલેંજ એટલે હૉરર સ્ટોરી

મુંબઈ, 14 ઑગસ્ટ : હૉરર ફિલ્મો માટે જાણીતા વિક્રમ ભટ્ટ લઈને આવી રહ્યાં છે વધુ એક બિહામણી ફિલ્મ. વિક્રમ ભટ્ટની ખાસિયત જ હૉરર ફિલ્મો છે. તેઓ વધુ એક વાર દર્શકોના હૃદયના ધબકાર વધારવાની તૈયારી કરી રહ્યાં છે. તેમની આગામી ફિલ્મ છે હૉરર સ્ટોરી કે જેનું દિગ્દર્શન અયુષ રૈનાએ કર્યું છે. અયુષ આ અગાઉ લઘુ ફિલ્મ બૉમ્બે હાઈનું દિગ્દર્શન કરી ચુક્યાં છે.

વિક્રમ ભટ્ટ નિર્મિત હૉરર સ્ટોરી ફિલ્મનો ફર્સ્ટ લુક જારી થઈ ચુક્યો છે. ફિલ્મની વાર્તા સાત યુવાનોની આસપાસ ફરે છે કે જેઓ શહેરની વચ્ચોવચ્ચ આવેલી એક ભુતાવળ હોટેલમાં રાત પસાર કરવાનો પડકાર સ્વીકારી લે છે. આ યુવાનોને નથી ખબર કે આ રાત તેમના જીવનની સૌથી ભયાનક અથવા એમ કહો કે છેલ્લી રાત સાબિત થશે. આ સાથે જ શરૂ થાય છે ભય અને રોમાંચનો સિલસિલો કે જેના માટે વિક્રમ ભટ્ટ જાણીતા છે.

ટેલીવિઝન અભિનેતા કરણ કુંદ્રા હૉરર સ્ટોરી સાથે બૉલીવુડ કૅરિયરની શરુઆત કરી રહ્યાં છે. ફિલ્મના અન્ય કલાકારોમાં રવીશ દેસાઈ, હસન ઝૈદી, નિશાંત મલકાન, શીતલ સિંહ, અપર્ણા બાજપાઈ, રાધિકા મેનન તથા નંદિની વૈદનો સમાવેશ થાય છે. ફિલ્મ 13મી સપ્ટેમ્બરે રિલીઝ થવાની છે.

English summary

Comming soon Horror Story to frighten. This is a film of Vikram Bhatt. Ayush Raina directing the movie.