શોલે 3ડી રિવ્યૂ : બસંતીની બક-બક ને ગબ્બરનો ભય 3ડીમાં
મુંબઈ, 3 જાન્યુઆરી : વર્ષ 1975માં રિલીઝ થયેલી ફિલ્મ શોલેએ બૉક્સ ઑફિસ ઉપર ધૂમ મચાવી હતી. જય તથા વીરૂની મૈત્રીએ દુનિયાને મિત્રતાનું દૃષ્ટાંત પૂરૂ પાડ્યુ હતું, તો ગબ્બરના પાત્રે બાળકોને ડરાવવા માટે માતાઓને એક નવી ફૉર્મ્યુલા આપી હતી. ફિલ્મના સંવાદો પણ દર્શકોને બહુ ગમ્યા હતાં. ખાસ તો ગબ્બર સાથે જોડાયેલા જેટલા ડાયલૉગ્સ હતાં, તે તમામ લોકોની જીભે ચડી ગયી હતાં. બસંતીના પાત્રમાં હેમા માલિનીએ પણ દર્શકોને બહુ હસાવ્યા હતાં. આમ તો આખી ફિલ્મમાં બસંતી કંઈ બોલી નહોતી, પણ બસંતીની ધન્નોએ જરૂર બોલી-બોલીને વીરૂને પોતાના વશમાં કરી લીધો હતો.
વાર્તા : એક નાનકડા ગામ રામગઢમાં એક નિવૃત્ત પોલીસકર્મી ઠાકુર બલદેવ સિંહ (સંજીવ કુમાર) ગબ્બર સિંહ (અમઝદ ખાન) સામે પોતાના પરિવારના મોતનો બદલો લેવા પોતે પકડેલા બે ચોરોને ગામે બોલાવે છે. તેમના પરિવારમાં માત્ર તેમની વિધવા વહુ રાધા (જયા બચ્ચન) બચ્યાં છે. જય (અમિતાભ બચ્ચન) તથા વીરૂ (ધર્મેન્દ્ર) મળી ઠાકુરના પરિવારના મોતનો બદલો લેવા રામગઢ આવે છે. ત્યાં આવી બંને ગાઢ મિત્રો બની જાય છે અને એક-બીજાને બચાવવા પોતાના જાનની બાજી લગાવી દે છે. દરમિયાન વીરૂના જીવનમાં બસંતી (હેમા માલિની) આવે છે અને તેને તેની સાથે પ્રેમ થઈ જાય છે. બીજી બાજુ જય પણ રાધા તરફ આકર્ષાય છે, પરંતુ પ્રેમનો ઇઝહાર નથી કરી શકતો. ફિલ્મમાં ગબ્બર અંગેના ઘણા ડાયલૉગ્સ છે કે જે દર્શકોને મનોરંજન પૂરૂ પાડે છે. ફિલ્મના 3ડી વર્ઝન અંગે થોડાક વિવાદો પણ છે, કારણ કે ફિલ્મના નિર્માતા રમેશ સિપ્પીએ શોલે 3ડી સામે બૅનની માંગ કરી છે.