સૈફ બન્યાં સો કરોડ ક્લબમાં જોડાનાર ચોથા ખાન
મુંબઈ, 13 ફેબ્રુઆરી : અબ્બાસ મસ્તાનની રેસ 2 ફિલ્મ વર્ષ 2013ની પ્રથમ સુપરહિટ ફિલ્મ છે. આ પહેલી વાર છે કે સૈફ અલી ખાનનો આ ક્લબમાં સમાવેશ થયો છે.
આ અગાઉ સો કરોડ ક્લબમાં માત્ર સલમાન ખાન, શાહરુખ ખાન અને આમિર ખાનનું જ વર્ચસ્વ હતું, પરંતુ સૈફે હવે આ ક્લબમાં પ્રવેશ કર્યો છે કે જેના કારણે સૈફ અલી ખાન આ ક્લબના ચોથા ખાન બન્યાં છે. એટલું જ નહીં રેસ 2 ફિલ્મના પગલે દીપિકા પાદુકોણેનો પણ પ્રથમ વાર આ ક્લબમાં સમાવેશ થયો છે. જોકે સૈફ-દીપિકાએ ગત વર્ષે પણ કૉકટેલ જેવી હિટ ફિલ્મ આપી હતી, પરંતુ તે સો કરોડનો ભાગ ન બની શકી હતી.
બીજી બાજુ હવે ફિલ્મ સમીક્ષકો દીપિકા-સૈફની જોડીને બૉક્સ ઑફિસ હિટ પૅર્સમાં ગણવા લાગ્યાં છે, કારણ કે બંનેની સાથે કરાયેલ અત્યાર સુધીની ત્રણ ફિલ્મો લવ આજ કલ, કૉકટેલ તેમજ રેસ 2એ ટિકિટ બારીએ શાનદાર બિઝનેસ કર્યો છે. તેના કારણે નિર્માતાઓ પણ આ જોડી ઉપર પૈસા લગાવી રહ્યાં છે. નંબર ગેમમાં વિશ્વાસ ધરાવતાં દીપિકા માટે રેસ 2ની સફળતા નવા વર્ષની ગિફ્ટ છે. એમ તો તેઓ આ વર્ષે સતત વ્યસ્ત જ છે.
રેસ 2ની જેમ જ દીપિકાને હવે સંજય લીલા ભાનુશાળીની ભવ્ય ફિલ્મ રામલીલા પાસે પણ ઘણી આશાઓ છે. આ ફિલ્મમાં તેમના હીરો છે રણવીર સિંહ.