વર્ષ 2013માં પણ સોનાની ચાંદી જ ચાંદી છે...
મુંબઈ, 2 જાન્યુઆરી : ના ભઈ ના. અમે સોનું એટલે કે ગોલ્ડની વાત નથી કરી રહ્યાં. અમે વાત કરીએ છીએ બૉલીવુડના સોના એટલે કે સોનાક્ષી સિન્હાની. સોનાક્ષી સિન્હાએ વર્ષ 2012 તો પોતાના નામે કરી લીધું છે. હવે તેમની નજર છે વર્ષ 2013 ઉપર. સમાચાર છે કે સોનાક્ષી સિન્હાએ તાજેતરમાં જ પોતાના એક ઇન્ટર્વ્યૂ દરમિયાન જણાવ્યું કે 2013માં પણ તેમની પાસે અનેક સારી ફિલ્મો છે અને તેમના બંને હાથો હાલ ભરેલાં છે. સાથે જ સોનાક્ષીએ એમ પણ જણાવ્યું કે જ્યારે આપ મહેનત કરો અને લોકો આપની મહેનતના કારણે જ આપને જાણે, તો ખૂબ સારૂં અનુભવાય છે.
વર્ષ 2013ની શરુઆતે સોનાક્ષી સિન્હાના હાથે લુટેરા, વન્સ અપૉન ઍ ટાઇમ ઇન મુંબઈ 2, બુલેટ રાજા જેવી મોટા બૅનરની ફિલ્મો છે. આ ફિલ્મો અંગે સોનાએ જણાવ્યું - 2013માં મારી પાસે લુટેરા, વન્સ અપૉન ઍ ટાઇમ ઇન મુંબઈ 2 જેવી ફિલ્મો છે. હું બુલેટ રાજા, રૅમ્બો રાજકુમારનું શુટિંગ પ્રભુદેવા તથા શાહિદ કપૂર સાથે કરવા જઈ રહી છું. સાથે જ થુપ્પક્કીની રિમેકમાં પણ હું કામ કરી રહી છું. મારા હાથ ભરેલાં છે.
નોંધનીય છે કે વર્ષ 2012માં સોનાક્ષી સિન્હાએ રાઉડી રાઠોડ, સન ઑફ સરદાર, દબંગ 2 જેવી હિટ ફિલ્મો આપી છે. સાથે જ તેમણે અક્ષય કુમાર, સલમાન ખાન અને અજય દેવગણ જેવા મોટા એક્ટરો સાથે કામ પણ કર્યું છે.