‘ધોતીવાળા પીએમ’ની ચાહતે વિશ્વરૂપમ ઉપર મુસીબત

Published: Thursday, January 31, 2013, 11:03 [IST]

ચેન્નઈ, 31 જાન્યુઆરી : કમલ હસનની મોસ્ટ અવેટેડ ફિલ્મ વિશ્વરૂપમ અંગે હવે રાજકારણ ગરમાઈ ગયું છે. એક બાજુ બુધવારે સાંજે સમાચાર આવ્યાં કે કમલ હસન પોતાની ફિલ્મના કેટલાંક અંશો કાપવા તૈયાર થઈ ગયાં છે, તો બીજી બાજુ ડીએમકે પ્રમુખ એમ. કરુણાનિધિએ ફિલ્મ વિશ્વરૂપમ વડે તામિળનાડુના મુખ્યમંત્રી જયલલિતા સામે નિશાનો સાધ્યો.

ડીએમકેના મુખપત્ર મુરાસોલીમાં ડીએમકે પ્રમુખે લખ્યું છે કે રાજ્ય સરકારે ફિલ્મની રિલીઝ અગાઉ કેમ કડક પગલા ન ભર્યાં? આખરે તે જ દિવસે એક્શન કેમ લેવાયું કે જે દિવસે ફિલ્મ રિલીઝ થવાની હતી. ડીએમકે સવાલ ઊભો કર્યો છે કે શું આ જયલલિતાની કોઈ ચોક્કસ ચાલ છે કે જે બદલો લેવાના આશયથી ચાલવામાં આવી છે?

કરુણાનિધિએ પોતાની વાતને સ્પષ્ટ કરવા ઉલ્લેખ કર્યો છે કે એવા સમાચાર છે કે અન્નાદ્રમુક સાથે ધરોબા ધરાવતી ટીવી ચૅનલ ફિલ્મ વિશ્વરૂપમના ડીટીએચ રાઇટ્સ ખરીદવા માંગતી હતી, પરંતુ કમલ હસને ઓછો ભાવ મળતાં તેમને રાઇટ્સ વેચ્યા નહીં. તેથી જયલલિતા સરકારે ફિલ્મ ઉપર પ્રતિબંધ ફરમાવ્યો છે કે જે અયોગ્ય છે.

કરુણાનિધિએ એમ પણ લખ્યું છે કે સરકાર કમલ હસન સામે તેમના એ નિવેદન અંગે પણ બદલો લઈ રહી છે કે જેમાં કમલે જણાવ્યું હતું કે તેઓ ધોતી પહેરતી કોઈ વ્યક્તિને દેશના વડાપ્રધાન બનતા જોવા માંગે છે. કમલનું આ નિવેદન પી. ચિદમ્બરમ તરફ ઇશારો કરતુ હતું. આ જ વાતથી જયલલિતા રોષે ભરાયાં છે અને તેમણે બદલો લેવાના ઇરાદે વિશ્વરૂપમ ફિલ્મ ઉપર પ્રતિબંધ લાદ્યો.

નોંધનીય છે કે ભલે મંગળવારે મદ્રાસ હાઈકોર્ટે ફિલ્મને લીલી ઝંડી આપી દીધી હતી, પરંતુ તામિળનાડુ સરકાર હાર માન્યા વગર ડબલ બેંચમાં ગઈ અને ત્યાંથી વચગાળોના મનાઈ હુકમ મેળવ્યો.

Published On January 31, 2013