Trailer : ઝંજીર જેવો દમ નથી લાગતો ઝંજીરમાં!

Updated: Monday, July 8, 2013, 15:23 [IST]

મુંબઈ, 8 જુલાઈ : તાજેતરમાં જ અમિતાભ બચ્ચનની પ્રથમ હિટ ફિલ્મ ઝંજીરની રીમેકનું ટ્રેલર જારી થયું છે. આ ટ્રેલર જોયા બાદ લોકો બહુ નિરાશ થયાં છે, કારણ કે ઝંજીરની રીમેકમાં તે દમ નથી કે જે અમિતાભ બચ્ચનની મૂળ ફિલ્મમાં હતો. અમિતાભની ઝંજીરે અનેક રેકૉર્ડ તોડ્યા હતાં અને સાથે જ અમિતાભ બચ્ચન અને જયા બચ્ચન આ ફિલ્મ બાદ જીવનની ઝંજીર સાથે જોડાઈ ગયા હતાં.

કહે છે કે ઝંજીર ફિલ્મ દરમિયાન જ અમિ-જયાને પ્રેમ થયો હતો. ઝંજીરમાં અમિતાભ બચ્ચન અને પ્રાણ વચ્ચે પણ સારી એવી મૈત્રી થઈ ગઈ હતી, કારણ કે ફિલ્મમાં પણ અમિતાભ-પ્રાણ મિત્રો હતાં.

હવે વાત કરીએ નવી ઝંજીર વિશે. તેમાં સાઉથના અભિનેતા રામચરણ તેજા મુખ્ય ભૂમિકામાં છે. તેમની એક્ટિંગમાં એ વાત નથી જણાતી કે જે અમિતાભમાં હતી. સાથે જ પ્રિયંકા ચોપરા કે જેઓ જયા બચ્ચનનો રોલ કરી રહ્યાં છે, તેઓ પણ કંઈ ખાસ અસર નથી છોડતાં. ફિલ્મમાં પ્રિયંકા-રામચરણના કેટલકાં ઇંટીમેટ સીન્સ પણ છે, જ્યારે ઝંજીરમાં એવી કોઈ વાત નહોતી.

ટ્રેલરમાં પ્રિયંકા ચોપરાએ આઈ લવ મુંબઈ પોલીસની પંચલાઇન ધરાવતી ટી-શર્ટ પણ પહેરી છે. ઉપરાંત રીમેકમાં સંજય દત્તે પ્રાણનો રોલ કર્યો છે, તો માહી ગિલ બિંદુના રોલમાં છે. ઝંજીરની રીમેક અંગે સૌને ખૂબ આશાઓ હતી, પરંતુ ટ્રેલર જાનદાર નથી લાગતું. પ્રકાશ રાજ રીમેકમાં વિલન છે કે જે અમિતાભની ઝંજીરમાં અજિત હતાં.