તમિલનાડુ અને ગુજરાતના કલાકારોનું હસ્તકલા કારીગરીનાં પ્રદર્શનને લઇને મુલાકાતીઓમાં ઉત્સાહ

સૌરાષ્ટ્ર તમિલ સંગમ કાર્યક્રમ ફક્ત બે પ્રદેશોના બાંધવોનો જ સંગમ નથી પરંતુ બે પ્રદેશોની કલા અને સંસ્કૃતિનો પણ અનોખો સંગમ છે. સોમનાથ સાગર દર્શનના પથિકા પરિસરમાં યોજાઈ રહેલા ઉત્સવમાં ગુજરાત અને તમિલનાડુના ૬૫ કલાકારો-કારીગરોની કલાકૃતિઓનું પ્રદર્શન અને વેચાણ શરુ રહ્યું છે.

આ પ્રદર્શનમાં અમદાવાદના કલાકાર સલીમ શેખે ૩,૨૦૦ ખીલીઓમાંથી તૈયાર કરેલી વડાપ્રધાન નરેન્દ્રભાઈ મોદીની છબીએ ભારે આકર્ષણ જમાવ્યું છે. પેન્સિલ અને દિવાસળીની કલાકૃતિ તૈયાર કરવાં માટે જાણીતા સલીમ ભાઈ શેખે વડાપ્રધાન નરેન્દ્રભાઈ મોદીની આબેહૂબ કલાકૃતિ તૈયાર કરી છે.

તેમણે જણાવ્યુ કે, મેં ક્યાંયથી પણ કલાની તાલીમ મેળવી નથી. હું જાતે જ અવનવી કલાકૃતિઓ બનાવું છું. વડાપ્રધાન નરેન્દ્રભાઈ મોદીની આ કૃતિ તૈયાર કરતા મને ૨૨ દિવસ જેટલો સમય થયો હતો. આ કૃતિ દ્વારા હું મારી કલા તેમને સમર્પિત કરુ છું.'

સલીમ ભાઈ શેખે પેન્સિલમાં કોતરણી કરીને બિલોરી કાચમાંથી જ જોઈ શકાય તેવી લોહપુરુષ સરદાર વલ્લભભાઈ પટેલની છબી પણ તૈયાર કરી છે, જે આ પ્રદર્શનમાં નિહાળી શકાય છે. અહીં આવતા મુલાકાતીઓમાં આ કૃતિ સાથે સેલ્ફી લેવાનું આકર્ષણ જોવાં મળી રહ્યું છે. અત્યાર સુધીમાં કાર્યક્રમમાં પધારેલા સર્વે મંત્રીઓ અને મહાનુભાવો દ્વારા પણ આ કૃતિમાં હસ્તાક્ષર કરી કલાના સાધક સલીમ ભાઈની કલાને બિરદાવવામાં આવી છે.

English summary

Artist from Ahmedabad created the image of PM with 3200 nails