કચ્છ નજીક સરહદેથી BSFએ 15 પાકિસ્તાની માછીમારોને ઝડપ્યા

બોર્ડર સિક્યુરિટી ફોર્સ એટલે કે BSF એ કચ્છ જિલ્લામાં ભારત-પાકિસ્તાન સરહદ નજીકથી 15 પાકિસ્તાની માછીમારોને ઝડપી પાડ્યા છે. આ માછીમારો પાસેથી એન્જિનવાળી એક બોટ પણ જપ્ત કરવામાં આવી છે.

BSFના અધિકારીઓના જણાવ્યા મુજબ, એક શંકાસ્પદ બોટ અંગે ચોક્કસ માહિતી મળતાં 68મી બટાલિયનના જવાનોએ શનિવારે કોરી ક્રીક વિસ્તારમાં એક સર્ચ ઓપરેશન શરૂ કર્યું હતું.

આ ઓપરેશન દરમિયાન સિંધ પ્રાંતના સુજાવાલ જિલ્લાના આ 15 માછીમારોને તેમની બોટ સાથે પકડવામાં આવ્યા છે.

બોટની તપાસ કરતાં તેમાંથી લગભગ 60 કિલોગ્રામ માછલી, નવ માછલી પકડવાની જાળ, ડીઝલ, ખાવા-પીવાની સામગ્રી, બરફ, લાકડીઓ, એક મોબાઇલ ફોન અને પાકિસ્તાની ચલણના 200 રૂપિયા મળી આવ્યા હતા. ઝડપાયેલા માછીમારોને વધુ તપાસ માટે સ્થાનિક પોલીસને સોંપવામાં આવ્યા છે.

જણાવી દઈએ કે, આ પહેલી ઘટના નથી જ્યારે પાકિસ્તાની માછીમારો ઝડપાયા હોય. આ પહેલા પણ ઘણી વખત પાકિસ્તાની માછીમારો ઘુસણખોરી કરતા પકડાયા છે.

English summary

BSF Nabs 15 Pakistani Fishermen and Seizes Boat Near Kutch Border