Cyclone Biparjoy: વાવાઝોડાના પગલે અનરાધાર વરસાદ, આજે પણ અતિ ભારે વરસાદની આગાહી, બનાસકાંઠામાં રેડ એલર્ટ

Cyclone Biparjoy: વાવાઝોડા બિપરજોયને પગલે સમગ્ર રાજ્યમાં વરસાદ પડી રહ્યો છે. રાજ્યના 175 તાલુકાઓમાં વરસાદ નોંધાયો છે. સૌથી વધુ માંડવીમાં 8.5 ઈંચ વરસાદ પડ્યો છે.

ઉત્તર ગુજરાત, સૌરાષ્ટ્ર અને કચ્છના વિસ્તારોમાં ધોધમાર વરસાદ વરસ્યો. માંડવીમાં ભારે વરસાદના કારણે ઠેર-ઠેર પાણી ભરાઈ ગયા છે. બનાસકાંઠામાં વરસાદ માટે રેડ એલર્ટ આપવામાં આવ્યુ છે. વળી, કચ્છ, પાટણ, મહેસાણામાં ઓરેન્જ એલર્ટ છે.

આજે પણ સમગ્ર રાજ્યમાં ભારે વરસાદની આગાહી છે. અમદાવાદ, મોરબી, સુરેન્દ્રનગર, ગાંધીનગર અને સાબરકાંઠામાં વરસાદ માટે યલો એલર્ટ આપવામાં આવ્યુ છે. બનાસકાંઠામાં ડીસા, પાલનપુર, અંબાજી, સૂઈગામ, નડાબેટમાં ભારે પવન સાથે મૂશળધાર વરસાદ નોંધાયો હતો.

હવામાન વિભાગ દ્વારા વાવાઝોડાની અસરને પગલે આજે ગુજરાતના અનેક જિલ્લાઓમાં ભારેથી અતિ ભારે વરસાદની આગાહી કરવામાં આવી છે. આજે વાવાઝોડા સાથે વરસાદની સંભાવના હવામાન વિભાગે વ્યક્ત કરી છે. જેમાં 30-40 કિમી પ્રતિ કલાકની ઝડપે પવન ફૂંકાઈ શકે છે. અમુક ભાગોમાં હળવાથી ભારે વરસાદની સંભાવના છે.

આગામી ત્રણ દિવસ 18, 19 અને 20 તારીખ દરમિયાન ભારે વરસાદની ચેતવણી છે. 18મીએ બનાસકાંઠા, સાબરકાંઠા, અરવલ્લી, મહેસાણા, ડાંગ, નવસારી, વલસાડ, દમણ, દાદરા નગર હવેલી અને સૌરાષ્ટ્રના જૂનાગઢ, અમરેલી, ગીર સોમનાથ અને દીવમાં હળવા કે ગાજવીજ સાથે વરસાદની સંભાવના છે.

હવામાન વિભાગે 19 અને 20 જૂને દાહોદ, પંચમહાલ, મહિસાગર, નવસારી, વલસાડ, દમણ, દાદરા નગર હવેલીમાં હળવા કે ગાજવીજ સાથે વરસાદની સંભાવના વ્યક્ત કરી છે. આ ઉપરાંત સૌરાષ્ટ્ર-કચ્છમાં હવામાન સૂકુ રહેવાની આગાહી કરવામાં આવી છે.

English summary

Cyclone Biparjoy: heavy to very heavy rain forecast today, red alert in Banaskantha