સ્થાનિક સ્વરાજ્યની ચૂંટણી જીતવા કોંગ્રેસનો માસ્ટર પ્લાન, રાજ્ય સ્તરે વિવિધ સમિતિઓ બનાવી

ગુજરાતમાં સ્થાનિક સ્વરાજ્યની આગામી ચૂંટણીઓનો જંગ જીતવા માટે કોંગ્રેસે કમર કસી છે. પક્ષના રાષ્ટ્રીય અધ્યક્ષ દ્વારા મંજૂરી મળતા જ રાજ્ય સ્તરે વિવિધ મહત્વની સમિતિઓની સત્તાવાર જાહેરાત કરવામાં આવી છે.

ચૂંટણી માટે સચોટ રણનીતિ ઘડવા માટે ભરતસિંહ સોલંકીની અધ્યક્ષતામાં વ્યૂહરચના સમિતિ બનાવવામાં આવી છે. આ સમિતિમાં લાલજી દેસાઈ ઉપાધ્યક્ષ અને હેમંગ વસાવડા કન્વીનર તરીકે પક્ષને જીત માટે માર્ગદર્શન પૂરું પાડશે.

ચૂંટણી પ્રચારને વેગ આપવાની જવાબદારી શક્તિસિંહ ગોહિલ, પરેશ ધાનાણી અને જેનીબેન ઠાકોરને સોંપવામાં આવી છે. આ ત્રિપુટી રાજ્યભરમાં પક્ષનો પ્રચાર-પ્રસાર મજબૂત કરવા માટે આયોજનબદ્ધ રીતે કાર્ય કરશે.

વ્યવસ્થાપન સમિતિની કમાન સિદ્ધાર્થ પટેલને સોંપાઈ છે, જ્યારે જીગ્નેશ મેવાણી અને બિમલ શાહ તેમાં સહયોગ આપશે. કાર્યક્રમ અમલીકરણ માટે જગદીશ ઠાકોર અને ઇન્દ્રવિજયસિંહ ગોહિલની વરણી કરવામાં આવી છે.

પક્ષનો મેનિફેસ્ટો તૈયાર કરવા માટે શૈલેષ પરમાર અને ડૉ. મનીષ દોષીને મહત્વની જવાબદારી મળી છે. મીડિયા સમિતિના માધ્યમથી ડૉ. અમી યાજ્ઞિક અને તેમની ટીમ જનતા સુધી પક્ષના સંદેશા પહોંચાડશે.

જાહેર પ્રચાર માટે કાદિર પીરઝાદા, અનંત પટેલ અને ચેતન રાવલની ટીમ મેદાનમાં ઉતારવામાં આવી છે. આ તમામ સમિતિઓ હવે આગામી દિવસોમાં ચૂંટણીલક્ષી કામગીરીમાં સક્રિયપણે જોડાઈ જશે.

English summary

Congress in Gujarat has formed state level committees to plan and coordinate campaigning, messaging, manifestos and overall election management for upcoming local elections, with designated chairs and conveners across campaign, media and programme execution panels.