Gujarat data center : ગુજરાતમાં ડેટા સેન્ટરનું નિર્માણ, હવે સિંગલ ક્લિકથી મહેસૂલી દસ્તાવેજોની નકલ મળી શકશે
Gujarat data center : ગુજરાતમાં મહેસૂલી દસ્તાવેજોની જાળવણી અને ઉપલબ્ધતાને વધુ સરળ બનાવવા માટે ગાંધીનગર ખાતે એક અત્યાધુનિક રાજ્ય કક્ષાનું ડેટા સેન્ટર બનાવવામાં આવી રહ્યું છે.
આ ડેટા સેન્ટર બન્યા બાદ નાગરિકોને તેમના મહેસૂલી દસ્તાવેજો જેમ કે 7/12 ના ઉતારા, જમીનના નકશા અને માપણીના દસ્તાવેજો માત્ર એક ક્લિક પર મળી શકશે. આ માહિતી મહેસૂલ મંત્રી જગદીશ વિશ્વકર્માએ વિધાનસભાના ચોમાસુ સત્ર દરમિયાન આપી.
મહેસૂલ વિભાગ દ્વારા તમામ જમીન દફતર અને મહેસૂલી કચેરીઓના દસ્તાવેજોનું ડિજિટાઇઝેશન કરવામાં આવ્યું છે. આ નવા ડેટા સેન્ટરમાં વર્ષ 1888થી ચાલી આવતા અંગ્રેજ સરકારના સમયના માપણીના રેકોર્ડ્સ પણ સુરક્ષિત રાખવામાં આવશે.
ગાંધીનગરના સેક્ટર-14માં 2,44,725 ચોરસ ફૂટમાં ફેલાયેલું 7 માળનું આ ભવ્ય ડેટા સેન્ટર બનશે. કુદરતી કે માનવસર્જિત આફતોથી જિલ્લા કક્ષાના રેકોર્ડને નુકસાન થાય તો તેની એક સુરક્ષિત નકલ અહીં ઉપલબ્ધ રહેશે. આ બાંધકામ ડિસેમ્બર-2026 સુધીમાં પૂર્ણ થવાની અપેક્ષા છે.
આ પહેલથી ગુજરાતમાં સરકારી સેવાઓ વધુ ઝડપી અને પારદર્શક બનશે, જેનાથી નાગરિકોને મોટી રાહત મળશે.
Click it and Unblock the Notifications
Sign in with Google
