Gujarat Winter: ગુજરાતમાં ઠંડી શરૂ, 14 ડિગ્રી તાપમાન સાથે ગાંધીનગર સૌથી ઠંડુ શહેર બન્યું

By Desk

Published: Sunday, November 9, 2025, 9:07 [IST]

Gujarat Winter: રાજ્યના તાપમાનમાં સરેરાશ 3 ડિગ્રીનો ઘટાડો, સીઝનમાં પ્રથમ વખત પારો 14 ડિગ્રીએ પહોંચ્યો, આગામી દિવસોમાં ઠંડીનો વધુ ચમકારો અનુભવાશે.

ગુજરાતમાં કમોસમી વરસાદની વિદાય બાદ શિયાળાએ સત્તાવાર રીતે દસ્તક આપી દીધી છે. રાજ્યભરમાં ગુલાબી ઠંડીનો જોરદાર અહેસાસ થઈ રહ્યો છે અને તાપમાનમાં સરેરાશ 3 ડિગ્રીનો ઘટાડો જોવા મળ્યો છે. રાજ્યના 17 જિલ્લાઓમાં તાપમાનનો પારો 20 ડિગ્રી સેલ્સિયસથી નીચે નોંધાયો છે, જેમાં રાજધાની ગાંધીનગર સૌથી વધુ ઠંડું રહ્યું છે.

ગાંધીનગરમાં સૌથી ઓછું 14 ડિગ્રી તાપમાન નોંધાયું

ગુજરાતમાં સીઝનમાં પ્રથમ વખત તાપમાનનો પારો 14 ડિગ્રી સુધી પહોંચ્યો છે. ગાંધીનગરમાં સૌથી ઓછું 14 ડિગ્રી લઘુત્તમ તાપમાન નોંધાયું છે.

ઉત્તરી પવનોથી ઠંડીનું જોર વધશે

હવામાન વિભાગની આગાહી મુજબ, આગામી દિવસોમાં ગુજરાતમાં ઠંડીનું જોર હજુ વધશે.

પવનની દિશા: પવનની દિશા ઉત્તર-પૂર્વથી પૂર્વ તરફની થતાં ઠંડા પવનોનો અનુભવ થશે.
તાપમાન: ઉત્તર તરફથી આવતા પવનના કારણે રાજ્યના મોટાભાગના જિલ્લાઓમાં 2થી 3 ડિગ્રી તાપમાન વધુ ઘટવાની શક્યતા છે.

ઉત્તર ભારતમાં હિમવર્ષાની અસર

ભારતમાં હવામાન ઝડપભેર પલટા લઈ રહ્યું છે. જમ્મુ-કાશ્મીરના ઊંચાઈવાળા ભાગોમાં હિમવર્ષાના કારણે ઉત્તર ભારતમાં ઠંડીનું પ્રમાણ વધ્યું છે, જેની સીધી અસર ગુજરાતના હવામાન પર જોવા મળી રહી છે.

શીતલહેરની આગાહી: હવામાન વિભાગે આગાહી કરી છે કે આગામી 3 દિવસ (8-0 નવેમ્બર) દરમિયાન પૂર્વ રાજસ્થાન અને પશ્ચિમ મધ્યપ્રદેશના કેટલાક ભાગોમાં શીતલહેરથી લઈને ગંભીર શીતલહેર જોવા મળી શકે છે. આ વિસ્તારોમાં રાત્રિનું તાપમાન સામાન્ય કરતાં 4થી 7 ડિગ્રી ઓછું રહેશે.

ઉત્તર ભારતમાં વધતી ઠંડીને કારણે ગુજરાતમાં પણ આગામી સપ્તાહમાં લોકોએ દિવસ દરમિયાન પણ ગરમ વસ્ત્રો પહેરવા પડે તેવી સ્થિતિ સર્જાશે.

Published On November 9, 2025