ગુજરાતમાં આગામી દિવસોમાં વાતાવરણ કેવું રહેશે? આવી ગઈ આગાહી
ગુજરાતમાં આગામી ૨૭ જાન્યુઆરી સુધી કમોસમી વરસાદની કોઈ શક્યતા નથી તેમ હવામાન વિભાગે જણાવ્યું છે. જોકે આ તારીખ બાદ નવી સિસ્ટમ સક્રિય થતા કેટલાક વિસ્તારોમાં છૂટાછવાયા વરસાદી ઝાપટાં પડી શકે છે.
હવામાન વિભાગના જણાવ્યા અનુસાર સિસ્ટમમાં ફેરફાર થવાને કારણે હાલમાં વરસાદી વાતાવરણ ટળ્યું છે. પરંતુ ૨૭ જાન્યુઆરી પછી ફરી એકવાર વાદળછાયા માહોલ વચ્ચે હળવો વરસાદ પડવાની સંભાવના જોવામાં આવી રહી છે.
ખાસ કરીને સૌરાષ્ટ્ર, કચ્છ અને ઉત્તર ગુજરાતના જિલ્લાઓમાં માવઠું પડવાની શક્યતા દેખાઈ રહી છે. આ વરસાદની સાથે જ રાજ્યમાં ફરી એકવાર કાતિલ ઠંડીનો નવો રાઉન્ડ પણ શરૂ થઈ શકે છે.
હાલમાં રાજ્યમાં સામાન્ય ઠંડી અનુભવાઈ રહી છે પરંતુ આગામી દિવસોમાં ઠંડા પવનના સુસવાટા વધશે. તાપમાનમાં ૨ થી ૩ ડિગ્રીનો ઘટાડો થતાં રાત્રિના સમયે તીવ્ર ઠંડીનો અહેસાસ નાગરિકોને થવા લાગશે.
છેલ્લા ૨૪ કલાકમાં અનેક શહેરોના તાપમાનમાં ૨ થી ૪ ડિગ્રી સુધીનો મોટો ઘટાડો નોંધાયો છે. મહિનાના અંત સુધીમાં અમદાવાદ જેવા શહેરોમાં લઘુત્તમ તાપમાન ૧૨ થી ૧૪ ડિગ્રી સુધી પહોંચી શકે છે.
અરબી સમુદ્રમાં હાલ પવનની ગતિ ૫૦ થી ૫૫ કિમી પ્રતિ કલાક હોવાથી તટીય વિસ્તારોમાં અસર દેખાશે. આ પવનની સીધી અસર સૌરાષ્ટ્ર અને ઉત્તર ગુજરાતના હવામાન પર પણ પડવાની શક્યતા છે.
તાજેતરના આંકડા મુજબ નલિયા ૫ ડિગ્રી સાથે રાજ્યનું સૌથી ઠંડુગાર શહેર નોંધાયું છે. જ્યારે ડીસા, અમરેલી અને રાજકોટમાં પણ તાપમાનનો પારો ૧૦ ડિગ્રીની નીચે પહોંચી જતાં ઠંડી વધી છે.
ઉત્તર ભારતમાં શિમલા અને મનાલીમાં સિઝનની પ્રથમ હિમવર્ષા થતા તેની અસર ગુજરાત પર પડી રહી છે. જમ્મુ-કાશ્મીરમાં ભારે બરફવર્ષાને કારણે માર્ગ વ્યવહાર અને હવાઈ સેવાઓને મોટી અસર પહોંચી છે.
શ્રીનગરમાં રનવે પર બરફ જામવાને કારણે ફ્લાઈટ્સ રદ કરવામાં આવી છે અને હાઈવે બંધ કરાયા છે. આ ભૌગોલિક ફેરફારોને કારણે ગુજરાતના વાતાવરણમાં પણ પલટો આવવાની પૂરેપૂરી શક્યતા વ્યક્ત કરાઈ છે.
Click it and Unblock the Notifications
Sign in with Google
