આજથી રાજ્યમાં હીટવેવની આગાહી, આ 13 જિલ્લાઓમાં કાળઝાળ ગરમી પડશે

રાજ્યમાં ગરમીમાં દિવસને દિવસે વધી રહી છે ત્યારે આગાહી મુજબ આજથી એટલે કે, 10 માર્ચથી રાજ્યમાં હીટવેવ શરૂ થશે. ગરમી તેનું રુદ્ર સ્વરૂપ બતાવશે તેવી આગાહી હવામાન વિભાગ દ્વારા કરવામા્ં આવી છે.

હવામાન વિભાગની આગાહી મુજબ, આગામી 48 કલાક આકરી ગરમી રાજ્યવાસીઓએ સહન કરવી પડશે. ઉત્તર ગુજરાતથી લઈ દક્ષિણ ગુજરાતના જિલ્લાઓમાં હિટવેવની આગાહી છે. સૌરાષ્ટ્ર અને મધ્ય ગુજરાતના જિલ્લાઓમાં પણ હિટવેવની આગાહી કરવામાં આવી છે. કેટલાક જિલ્લામાં ગરમ અને ભેજયુક્ત વાતાવરણ રહેશે.

ઉત્તર ગુજરાત અને દક્ષિણ ગુજરાતના કેટલાક વિસ્તારો માટે હવામાન વિભાગ દ્વારા એલર્ટ જાહેર કરવામાં આવ્યું છે. આ વિસ્તારોમાં તાપમાન 42 ડિગ્રી સુધી પહોંચવાની શક્યતા છે.

આ અંગે હવામાન નિષ્ણાંત પરેશ ગૌસ્વામીની પણ આગાહી સામે આવી છે તેમના મુજબ, આગામી દિવસોમાં ભેજવાળા પવનોને કારણે રાજ્યમાં અસહ્ય ગરમી અને બફારો અનુભવાશે. ખાસ કરીને 11 માર્ચથી પવનની ગતિમાં વધારો થવાની શક્યતા છે, જે 18થી 22 કિમી પ્રતિ કલાકની ઝડપે ફૂંકાશે.

જ્યારે અરબ સાગર તરફથી ભેજવાળા પવનો ફૂંકાવાના કારણે સૌરાષ્ટ્ર, કચ્છ અને દક્ષિણ ગુજરાતમાં ગરમી અને બફારો વધુ અનુભવાશે. આ સાથે જ લઘુત્તમ તાપમાનમાં પણ વધારો થવાનો અંદાજ લગાવવામાં આવ્યો છે, જે રાત્રી દરમિયાન પણ ગરમીના અસરકારક પ્રભાવને વધુ તીવ્ર બનાવી શકે છે.