હિંમતનગરમાં બોલ્યા કેજરીવાલ- અમારી સરકાર લાવો, વિજળીનુ બીલ ઝીરો આવશે

આમ આદમી પાર્ટીના રાષ્ટ્રીય સંયોજક અને દિલ્હીના સીએમ અરવિંદ કેજરીવાલ હિંમતનગર ખાતે આવી પહોંચ્યા હતા. અરવિંદ કેજરીવાલની સાથે મનીષ સીસોદીયા, ઇન્દ્રનીલ રાજ્યગુરૂ, ગોપાલ ઇટલીયા, ઈશુદાન ગઢવી સહિતના આપના હોદ્દેદારો ટાઉનહોલ ખાતે પહોંચ્યા હતા. સાબરકાંઠા જિલ્લાના મુખ્ય મથક હિંમતનગરમાં આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલ અને નાયબ મુખ્યમંત્રી મનીષ સિસોદિયાની જાહેરસભાનું આયોજન કરવામાં આવ્યું છે. જ્યાં પહોંચતાની સાથે જ ટાઉનહોલની બહાર અરવિંદ કેજરીવાલ અને મનીષ સીસોદીયાનું ભવ્ય સ્વાગત કરવામાં આવ્યું હતું.

આ પ્રસંગે અરવિંદ કેજરીવાલે સભાને સંબોધતાં જણાવ્યું હતું કે ગજબનો ઉત્સાહ છે તમારા લોકોમાં. લોકોને જોઈને એવું લાગી રહ્યું છે કે, ગુજરાત હવે બદલાવ માંગે છે. આ ધર્મ યુદ્ધ છે. આજે આ લોકો પાસે મોટી સેના છે તો અમારી પાસે ભગવાન છે. આજે અમારી પાસે જનતાનો સાથ છે. આજે અમે દિલ્હીમાં જે કામ કર્યુ છે તે 75 વર્ષમાં નથી થયું. ગુજરાતમાં દિલ્હી જેવા સરકારી હોસ્પિટલ-સ્કૂલ જોઈએ છે ને? તમારે ગુજરાતમાં વીજળીના બિલ ઝીરો જોઈએ છે કે નહીં? અમારી સરકાર બનશે તો 3 મહિનામાં જ વીજળીના બિલ ઝીરો કરી દઈશું.

અરવિંદ કેજરીવાલે 10 લાખ સરકારી નોકરી આપવાનો વાયદો કર્યો હતો. તેમણે કહ્યું હતું કે પેપર ફૂટવાની ઘટનાઓ બાબતે નવા કાયદા કાનૂન લાવીશું. પેપર ફોડવાવાળાઓને જેલ ભેગા કરીશું. 18 વર્ષથી ઉપરની મહિલાના એકાઉન્ટમાં દર મહિને 1 હજાર રૂપિયા જમા કરીશું. તમારા બાળકોને સારું શિક્ષણ આપવાની જવાબદારી અમારી છે.

તેમણે સ્વાસ્થ્ય અંગે વાતચીત કરતાં જણાવ્યું હતું કે તેમની સરકાર આવશે તો બધાને મફત ઈલાજ-સારો ઈલાજ આપવાની જવાબદારી એમની સરકારની છે. તમામ લોકોને બધી દવાઓ-ટેસ્ટ અને ઓપરેશન ફ્રી કરવામાં આવશે. તમે મને વોટ આપો હું તમને ફ્રી વીજળી આપીશ, તમે મને વોટ આપો હું તમને મફત ઈલાજ આપીશ. તેમણે ડ્રાઈવર-કંડક્ટરના પગારમાં એક મહિનામાં વધારો કરવાનો વાયદો કર્યો હતો. પોલીસ જવાનોને જણાવ્યું હતું કે અમારી સરકાર બને તો ગ્રેડ પે અમારી પાસેથી લઈ લેજો. એક મહિનાની અંદર બધાની તમામ માગ હું પૂરી કરીશ.

English summary

Kejriwal spoke in Himmatnagar - bring our government, the electricity bill will be zero