જાસૂસીકાંડમાં તપાસ પ્રક્રિયાને રદ કરતી ગુજરાત હાઇકોર્ટ

અમદાવાદ, 10 ઓક્ટોબરઃ બહુચર્ચિત મહિલા જાસૂસીકાંડમાં કરવામાં આવેલી રહેલી તપાસને ગુજરાત હાઇકોર્ટ દ્વારા રદ કરી નાંખવામાં આવી છે. હાઇકોર્ટ દ્વારા યુવતીના પિતા દ્વારા કરવામાં આવેલી અરજીની સુનાવણી દરમિયાન આ નિર્ણય સંભળાવ્યો હતો. યુવતીના પિતા દ્વારા આ કેસને રદ કરવાની અપીલ કરવામાં આવી હતી અને કહેવામાં આવ્યું હતું કે આ તેમનો અંગત મામલો છે.

સુનાવણી દરમિયાન રાજ્ય સરકાર દ્વારા રચવામાં આવેલા જસ્ટિસ સુજ્ઞાબેન ભટ્ટ કમિશનને રદ કરી નાંખવામાં આવ્યું છે, નોંધનીય છેકે, આ અગાઉ પણ યુવતીના પિતાએ સુપ્રીમ કોર્ટમાં કહ્યું હતું કે તેમના કહેવાથી જ ગુજરાત સરકાર દ્વારા તેમની પુત્રી પર નજર રાખવામાં આવી રહી હતી.

અત્રે ઉલ્લેખનીય છેકે, સ્નૂપગેટના મુદ્દાને લોકસભાની ચૂંટણી પહેલા ઘણો જ ઉછાળવામાં આવ્યો હતો અને કોંગ્રેસ દ્વારા એ સમયના તત્કાલિન મુખ્યમંત્રી નરેન્દ્ર મોદી કે જેઓ ભાજપના વડાપ્રધાન પદના ઉમેદવાર હતા તેમને ટાર્ગેટ કરવામાં આવી રહ્યાં હતા. તેમજ બે ન્યૂઝ વેબસાઇટ પર ઓડિયો ટેપ પણ પ્રસારિત કરવામાં આવી હતી. જેમાં અમિત શાહ દ્વારા 2009માં પોલીસને આર્કિટેક્ટ યુવતી પર નજર રાખવાનો આદેશ આપવામાં આવ્યો હોવાનું અને તે ‘સાહેબ'ના ઇશારે કરવામાં આવ્યું હોવાનું દર્શાવવામાં આવ્યું હતું.

English summary

Snoop-gate Investigation Cancelled by Gujarat High Court