ડીજે વિવાદને લઈને ગેનીબેન આક્રમક, કહ્યું-ગોળી ખાવા તૈયાર

ક્ષત્રિય ઠાકોર સમાજમાં સામાજિક સુધારા માટે અમલી બનેલા નવા 'બંધારણ' અને ડીજે પરના પ્રતિબંધને લઈ હાલ ગુજરાતમાં મોટો વિવાદ સર્જાયો છે.

તાજેતરમાં સોશિયલ મીડિયા પર એક વરઘોડાનો વીડિયો વાયરલ થયો હતો, જેમાં બંધારણનો વિરોધ કરી ઉશ્કેરણીજનક શબ્દોનો ઉપયોગ કરવામાં આવ્યો હતો.

આ વાયરલ વીડિયોમાં "બંધારણવાળાઓને બંદૂકની ગોળી મારો" જેવા શબ્દો પ્રયોજાતા લોકપ્રિય સાંસદ ગેનીબેન ઠાકોરે આકરા પ્રહાર કર્યા છે.

ગેનીબેને સ્પષ્ટ શબ્દોમાં જણાવ્યું કે, જો સમાજના ભલા માટે અને સુધારા માટે મારે ગોળી ખાવાની તૈયારી રાખવી પડશે તો હું તૈયાર છું. તેમણે ઉમેર્યું કે આ બંધારણ કોઈ વ્યક્તિગત સ્વાર્થ માટે નથી, જે લોકો ગોળી મારવાની વાત કરે છે તેમનું નામ શહીદોમાં લખાશે.

આ વિવાદિત ઘટના પાટણના ઉંદરા ગામે 3 ફેબ્રુઆરીએ આયોજિત એક ધાર્મિક પ્રસંગ દરમિયાન બની હતી, જ્યાં ઉશ્કેરણીજનક ગીત વગાડવામાં આવ્યું હતું. ખેડા ઠાકોર સેનાના પ્રમુખ ઈશ્વરસિંહ પરમારે આ મામલે કલાકાર સામે કડક કાયદેસરની કાર્યવાહી કરવાની માંગણી કરતા મામલો વધુ ગરમાયો હતો.

ચારેબાજુથી વિરોધ વધતા ગીત ગાનાર લોકગાયક સુનિલ ઠાકોરે નમતું જોખ્યું છે અને સોશિયલ મીડિયા પર વીડિયો મૂકી માફી માંગી છે.

ગાયકે પોતાની ભૂલ સ્વીકારતા કહ્યું કે, કાર્યક્રમ દરમિયાન અજાણતા આ શબ્દો બોલાઈ ગયા હતા, જેના માટે હું સમગ્ર સમાજની માફી માંગુ છું. ગેનીબેન ઠાકોરે કલાકારોને મર્યાદામાં રહીને ગીતો ગાવાની અને યુવાનોને સોશિયલ મીડિયા પર સંયમિત ભાષા વાપરવાની ખાસ સલાહ આપી છે.

English summary

The article reports on the controversy around the Thakor communitys new constitution and a DJ ban following a provocative song. Leaders condemn the lyrics, calls for reform intensify, and a public apology is issued by a musician, highlighting ongoing social reform tensions in Patan.