આસામ સહિત 5 રાજ્યની વિધાનસભા ચૂંટણીની તારીખો જાહેર, જાણો ક્યારે થશે મતદાન

By Desk

Published: Sunday, March 15, 2026, 17:37 [IST]

Election Commission: ભારતીય ચૂંટણી પંચે આજે દેશના મહત્વના પાંચ રાજ્યો અને કેન્દ્રશાસિત પ્રદેશો માટે વિધાનસભા ચૂંટણીનો કાર્યક્રમ સત્તાવાર રીતે જાહેર કરી દીધો છે. આસામ, કેરળ, પુડુચેરી, તમિલનાડુ અને પશ્ચિમ બંગાળમાં યોજાનારી આ ચૂંટણીની તારીખોની જાહેરાત થતાની સાથે જ જે-તે રાજ્યોમાં આદર્શ આચારસંહિતા (MCC) અમલી બની ગઈ છે.

કયા રાજ્યમાં ક્યારે થશે મતદાન?

ચૂંટણી પંચના જણાવ્યા અનુસાર, અલગ-અલગ તબક્કામાં મતદાન યોજાશે પરંતુ તમામ રાજ્યોનું પરિણામ 4 મેના રોજ એકસાથે જાહેર કરવામાં આવશે.

આસામ, કેરળ અને પુડુચેરી: આ ત્રણેય વિસ્તારોમાં માત્ર એક જ તબક્કામાં 9 એપ્રિલે મતદાન પ્રક્રિયા પૂર્ણ થશે.
તમિલનાડુ: અહીં પણ એક જ તબક્કામાં 23 એપ્રિલે વોટિંગ યોજાશે.
પશ્ચિમ બંગાળ: બંગાળમાં આ વખતે માત્ર બે જ તબક્કામાં ચૂંટણી યોજાશે. પ્રથમ તબક્કો 23 એપ્રિલે અને બીજો તબક્કો 29 એપ્રિલે યોજાશે.

એક નજરે ચૂંટણી કાર્યક્રમ

17.4 કરોડ મતદારો નક્કી કરશે ભાવિ

મુખ્ય ચૂંટણી કમિશનર જ્ઞાનેશ કુમારે પત્રકાર પરિષદમાં માહિતી આપતા જણાવ્યું કે, આ પાંચેય રાજ્યોની કુલ 824 વિધાનસભા બેઠકો પર અંદાજે 17.4 કરોડ (174 મિલિયન) મતદારો પોતાના મતાધિકારનો ઉપયોગ કરશે.

ચૂંટણી પંચના નવા અને કડક નિયમો

આ વખતે ચૂંટણી પ્રક્રિયાને વધુ પારદર્શક અને સુદ્રઢ બનાવવા માટે પંચે કેટલાક મહત્વના ફેરફારો કર્યા છે:

મોબાઈલ પર પ્રતિબંધ: મતદાન મથકની અંદર મોબાઈલ ફોન લઈ જવા પર સંપૂર્ણ પ્રતિબંધ રહેશે. મતદારોએ પોતાનો ફોન બહાર જ રાખવો પડશે.
SIR પહેલ: મતદાર યાદીને ક્ષતિરહિત અને એકદમ સચોટ બનાવવા માટે 'SIR' સિસ્ટમ અમલમાં મૂકવામાં આવી છે, જેથી કોઈ પણ અયોગ્ય નામ યાદીમાં ન રહે.

2021ની સરખામણીએ આ વખતે શું બદલાયું?

મે મહિનામાં વર્તમાન વિધાનસભાઓનો કાર્યકાળ પૂર્ણ થઈ રહ્યો છે ત્યારે પંચે આ વખતે મોટો ફેરફાર કર્યો છે. વર્ષ 2021ની ચૂંટણીમાં પશ્ચિમ બંગાળમાં 8 તબક્કામાં અને આસામમાં 3 તબક્કામાં મતદાન થયું હતું. જેની સરખામણીએ આ વખતે બંગાળમાં માત્ર 2 અને આસામમાં 1 જ તબક્કામાં ચૂંટણી પૂર્ણ કરવાનો નિર્ણય લેવાયો છે, જે વહીવટી દ્રષ્ટિએ મોટી સફળતા માનવામાં આવે છે.

Published On March 15, 2026