BMC Election 2026: મુંબઈમાં ઠાકરે બંધુઓ કે મહાયુતિ? મતદાન શરૂ, કોણ મારશે બાજી

By Desk

Published: Thursday, January 15, 2026, 10:36 [IST]

BMC Election 2026: દેશની સૌથી ધનિક મહાનગરપાલિકા એવી મુંબઈ મહાનગરપાલિકા (BMC) માટે આજે રણશિંગુ ફૂંકાઈ ગયું છે. મુંબઈ સહિત મહારાષ્ટ્રની કુલ 29 મહાનગરપાલિકાઓમાં આજે, 15 જાન્યુઆરી 2026ના રોજ મતદાન પ્રક્રિયા શરૂ થઈ છે. સવારથી જ મતદાન મથકો પર મતદારોની લાંબી કતારો જોવા મળી રહી છે, જે મુંબઈના આગામી શાસકની પસંદગી કરવા માટે ઉત્સાહિત છે.

સત્તાનું ગણિત અને ઠાકરે બંધુઓનો સંગાથ

આ વખતની BMC ચૂંટણી રાજકીય રીતે અત્યંત રસાકસીભરી છે. 2022માં શિવસેનામાં પડેલા ભંગાણ બાદ ઉદ્ધવ ઠાકરે પોતાની જૂની શક્તિ પાછી મેળવવા પ્રયત્નશીલ છે. સૌથી નોંધપાત્ર બાબત એ છે કે, લગભગ 20 વર્ષના ગજગ્રાહ બાદ ઉદ્ધવ ઠાકરે અને રાજ ઠાકરે (MNS) મરાઠી અસ્મિતાના મુદ્દે એકસાથે આવ્યા છે. બંને ભાઈઓના આ જોડાણે મહાયુતિ (ભાજપ-શિંદે જૂથ) માટે પડકાર ઉભો કર્યો છે.

ચૂંટણીના મહત્વના આંકડા

કુલ વોર્ડ: 227
ઉમેદવારોની સંખ્યા: 1,700
મતદાનની તારીખ: 15 જાન્યુઆરી, 2026
પરિણામની તારીખ: 16 જાન્યુઆરી, 2026
વાર્ષિક બજેટ: ₹74,000 કરોડથી વધુ

નોંધ: BMCના કોર્પોરેટરોનો કાર્યકાળ માર્ચ 2022માં પૂરો થયો હતો. ત્યારથી અત્યાર સુધી વહીવટદાર દ્વારા પાલિકાનું સંચાલન કરવામાં આવતું હતું.

#WATCH | Maharashtra: Legendary cricketer Sachin Tendulkar arrives at a polling station in Mumbai to cast his vote for the BMC elections. pic.twitter.com/4jwAVeLJJe
— ANI (@ANI) January 15, 2026

કયા પક્ષો વચ્ચે છે સીધી લડાઈ?

આ ચૂંટણીમાં ગઠબંધનોના નવા સમીકરણો જોવા મળી રહ્યા છે.

ઠાકરે ગઠબંધન: શિવસેના (UBT) અને મહારાષ્ટ્ર નવનિર્માણ સેના (MNS) સાથે મળીને લડી રહ્યા છે.
મહાયુતિ: ભાજપ અને શિવસેના (એકનાથ શિંદે જૂથ) વચ્ચે મજબૂત ગઠબંધન છે.
કોંગ્રેસ-VBA: કોંગ્રેસે પ્રકાશ આંબેડકરની બહુજન વંચિત આઘાડી (VBA) સાથે હાથ મિલાવ્યા છે.
NCP: શરદ પવાર અને અજિત પવારના બંને જૂથો સ્વતંત્ર રીતે મેદાનમાં છે.

બેઠકોની વહેંચણી અને રસાકસી

ભાજપ મુંબઈમાં સૌથી વધુ 137 બેઠકો પર ચૂંટણી લડી રહ્યું છે, જ્યારે શિંદે જૂથ 90 બેઠકો પર મેદાનમાં છે. બીજી તરફ ઠાકરે સેના 150 અને MNS 70 બેઠકો પર પોતાનું નસીબ અજમાવી રહ્યા છે. ખાસ વાત એ છે કે, 32 બેઠકો એવી છે જ્યાં ભાજપ-શિંદે વિરુદ્ધ ઠાકરે-રાજ વચ્ચે સીધી ટક્કર છે, કારણ કે ત્યાં ત્રીજા પક્ષે કોઈ ઉમેદવાર ઉભા રાખ્યા નથી.

BMC કેમ છે આટલી મહત્વની?

BMC માત્ર એક સ્થાનિક સ્વરાજ્યની સંસ્થા નથી પણ એશિયાની સૌથી મોટી મહાનગરપાલિકા છે. તેનું વાર્ષિક બજેટ ભારતનાં અનેક નાના રાજ્યો (જેમ કે ગોવા, સિક્કિમ અને મણિપુર) કરતાં પણ ઘણું વધારે છે. આથી જ મુંબઈ પર કબજો મેળવવો એ દરેક રાજકીય પક્ષ માટે પ્રતિષ્ઠાનો પ્રશ્ન બની ગયો છે.

Published On January 15, 2026