મોદી ઇફેક્ટ! રાજીવ ગાંધીને 'સરકારી' શ્રદ્ધાંજલિ નહીં

Published: Wednesday, May 21, 2014, 18:14 [IST]

નવી દિલ્હી, 21 મે: દેશના પૂર્વ વડાપ્રધાન રાજીવ ગાંધીની આજે 23મી પૂણ્યતિથિ છે, પરંતુ આ વખતે તેમની પુણ્યતિથિ પાછલા વર્ષો કરતા કઇ અલગ દેખાઇ રહી છે. આજના દિવસે દરેક વર્ષે દેશના તમામ અખબારોમાં રાજીવ ગાંધી છવાયેલા રહેતા હતા. 2004માં જ્યારે કોંગ્રેસ સત્તામાં આવી ત્યારથી સતત રાજીવ ગાંધીની જન્મતિથિ અને પુણ્યતિથિ પર કરોડો રૂપિયાના સરકારી વિજ્ઞાપન સમાચારોમાં છવાયેલા રહેતા હતા.

પરંતુ હવે દેશની સત્તા બદલાઇ ચૂકી છે, નરેન્દ્ર મોદી દેશના ભાવી વડાપ્રધાન છે. જોકે તેમણે હજી શપથ લીધી નથી અને કાર્યભાર સંભાળ્યો નથી પરંતુ આને મોદીની અસર જ માનવામાં આવી રહી છે કે જે સમાચાર પત્રો રાજીવ ગાંધીને શ્રદ્ધાંજલિથી ભરાયેલા રહેતા હતા તે આજે ખાલી પડ્યા છે. માત્ર હરિયાણા સરકારની એક જાહેરાતે તેમને શ્રદ્ધાંજલિ આપી છે. જોકે મોદીએ આજે દેશના પૂર્વ વડાપ્રધાન રાજીવ ગાંધીને તેમની 23મી પુણ્યતિથિ પર ટ્વિટરના માધ્યમથી તેમને શ્રદ્ધાંજલિ અર્પણ કરી છે.

દરેક વર્ષે દેશના તમામ કોંગ્રેસ શાસિત રાજ્ય પણ રાજીવ ગાંધીની જાહેરાતમાં કરોડો રૂપિયા ખર્ચ કરતા હતા. અહીં સુધી કે ઇન્ડિયન એરલાઇન્સ જે દર વર્ષે રાજીવ ગાંધીના જન્મદિવસ અને પુણ્યતિથિ પર જાહેરાત આપતું હતું તેણે પણ આ વર્ષે કોઇ જાહેરાત નથી આપી. અત્રે નોંધનીય છે કે રાજીવ ગાંધી રાજનીતિમાં આવતા પહેલા ઇન્ડિયન એરલાઇન્સમાં જ પાયલટ હતા. એક માહિતી અનુસાર યૂપીએએ માત્ર 2012માં જાહેરાત પર 22 કરોડ રૂપિયા ખર્ચ્યા હતા.

કોણે કોણે આપી રાજીવ ગાંધીને શ્રદ્ધાંજલિ, જુઓ તસવીરોમાં...