India Weather: કડકડતી ઠંડી વચ્ચે ઉત્તર-પૂર્વના રાજ્યોમાં ગાઢ ધૂમ્મસનુ એલર્ટ, વરસાદની પણ સંભાવના
India Weather: ઉત્તર ભારતીય ક્ષેત્રમાં તીવ્ર ઠંડી વચ્ચે, ભારતીય હવામાન વિભાગ (IMD)એ આગામી ચાર દિવસ દરમિયાન ઉત્તર અને ઉત્તર-પૂર્વના કેટલાક રાજ્યોમાં ધુમ્મસની ચેતવણી જાહેર કરી છે. શનિવારે રાષ્ટ્રીય રાજધાની દિલ્હીમાં ગાઢ ધુમ્મસ પછી, કેટલાક વિસ્તારોમાં હળવા ઝરમર વરસાદની પણ સંભાવના છે.
હવામાન વિભાગે દિલ્હીમાં ધુમ્મસને લઈને યલો એલર્ટ જાહેર કર્યું છે. ગાઢ ધુમ્મસ બાદ દિલ્હી વાદળછાયું રહેશે, જેના કારણે વિઝિબિલિટી 200 મીટરથી ઓછી રહી શકે છે. દિલ્હીમાં આજે પવનની ઝડપ 4થી 10 કિમી પ્રતિ કલાક રહી શકે છે. આજે લઘુત્તમ તાપમાનમાં પણ વધારો થવાની સંભાવના છે.
IMD અનુસાર, આગામી ચાર દિવસ દરમિયાન પંજાબના વિવિધ ભાગોમાં સવારે અતિ ગાઢ ધુમ્મસની સંભાવના છે. હવામાન વિભાગે આગામી ત્રણ દિવસ દરમિયાન હરિયાણાના વિવિધ ભાગોમાં સવારે ગાઢ ધુમ્મસની સ્થિતિની ચેતવણી પણ આપી છે.
આગામી બે દિવસ એટલે કે 23 અને 24 ડિસેમ્બર દરમિયાન ઉત્તરી ઉત્તર પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરા અને ઓડિશા માટે ધુમ્મસની ચેતવણી જારી કરવામાં આવી છે. ઉત્તરાખંડ, હિમાચલ પ્રદેશ અને જમ્મુ કાશ્મીરના પર્વતીય રાજ્યોમાં અત્યંત ઠંડી છે. હિમવર્ષા અને શીત લહેર સર્વત્ર ચાલુ છે.
IMD અનુસાર, તમિલનાડુના ચાર જિલ્લા થૂથુકુડી, તિરુનેલવેલી, તેનકાસી અને કન્યાકુમારીમાં હજુ પણ વરસાદની સંભાવના છે. છેલ્લા કેટલાક દિવસોમાં આ ચાર રાજ્યોમાં ભારે વરસાદ થઈ રહ્યો છે.
હાલમાં તમિલનાડુના તિરુનેલવેલી જિલ્લામાં ભારે વરસાદ ચાલુ છે, જેના કારણે પૂર જેવી સ્થિતિ સર્જાઈ છે અને જનજીવન અસ્તવ્યસ્ત થઈ ગયું છે. આ સિવાય પુડુચેરી અને કરાઈકલ ક્ષેત્રમાં એક-બે જગ્યાએ હળવાથી મધ્યમ વરસાદની શક્યતા છે.
Click it and Unblock the Notifications
Sign in with Google
