કર્ણાટક : સિદ્ધરમૈયાના મંત્રીમંડળમાં 28 મંત્રીઓએ શપથ લીધા

Published: Saturday, May 18, 2013, 13:43 [IST]

બેંગલોર, 18 મે : કર્ણાટકના મુખ્યમંત્રી સિદ્ધરમૈયાએ શનિવાર 18 મે, 2013ના રોજ પોતાના મંત્રીમંડળમાં 28 મંત્રીઓનો સમાવેશ કર્યો હતો. તેમાંથી 20ને કેબિનેટ મંત્રીનો દરજ્જો આપવામાં આવ્યો છે. બાકીના 8 મંત્રીઓ રાજ્ય મંત્રી બન્યા છે.

કર્ણાટકના રાજ્યપાલ હંસરાજ ભારદ્વાજે રાજભવનમાં આયોજિત એક સમારોહમાં મંત્રીઓને પદ અને ગોપનિયતાના શપથ લેવડાવ્યા હતા. સિદ્ધરમૈયાએ 13 મેના રોજ મુખ્યમંત્રી પદના શપથ લીધા હતા. કોંગ્રેસ રાજ્યમાં સાત વર્ષ બાદ સત્તામાં આવી છે.

સિદ્ધરમૈયા છ વર્ષ પહેલા જનતાદળ એસને છોડીને કોંગ્રેસમાં જોડાયા હતા. તેઓ ધરમસિંહના નેતૃત્વવાળી સરકારમાં ઉપમુખ્યમંત્રી રહી ચૂક્યા હતા. એચ ડી દેવેગૌડાના વડાપ્રધાન બન્યા બાદ વર્ષ 1996માં વકીલમાંથી નેતા બનેલા સિદ્ધરમૈયા મુખ્યમંત્રીનું પદ મેળવતા મેળવતા રહી ગયા હતા.

સિદ્ધરમૈયા કુરુબા સમુદાયનું પ્રતિનિધિત્વ કરે છે. કર્ણાટકમાં તે સૌથી મોટી જાતિ છે. તેમને મુખ્યમંત્રી પદની દોડમાં તે સમયે જે એચ પટેલે પાછળ છોડા દીધા હતા. દેવૈગૌડા અને પટેલ બંનેના કાર્યકાળ દરમિયાન સિદ્ધરમૈયા રાજ્યના નાણા પ્રધાન રહી ચૂક્યા છે.

Published On May 18, 2013