તિહાડના કેદીઓ હવે TJ FM રેડિયોથી મેળવશે મનોરંજન!

Updated: Wednesday, July 31, 2013, 14:49 [IST]

નવી દિલ્હી, 31 જુલાઇ : દિલ્હીની તિહાડ જેલના કેદીઓ હવે રેડિયો સાંભળી શકશે. મંગળવારે ચરખો અને ખાનગી એફએમ રેડિયો ચેનલની શરૂઆત થઈ છે. જેલના અધિકારીએ આપેલી માહિતી પ્રમાણે જેલમાં ચરખા એકમમાં મહાત્મા ગાંધીના અહિંસા અને સાંપ્રદાયિક સૌહાર્દના સંદેશને પ્રસારિત કરાશે અને TJ એફએમ કેદીઓનું મનોરંજન કરશે.

આ સાથે કેદીઓ દ્વારા ચાદર બનાવવાનું એક યુનિટ પણટૂંક સમયમાં શરૂ થશે. આ માટે કેદીઓને મશીન અને કાચો માલ અધિકારીઓ ઉપલબ્ધ કરાવશે. આ એકમ દર મહિને 10000 જેટલી ચાદરો બનાવશે. આ ઉપરાંત કેદીઓને રેડિયો જોકી તરીકેનું શિક્ષણ પણ આપવામાં આવશે. નાઇજીરિયાના દસ તેમજ અન્ય વિદેશી કેદીઓ ખાદી બનાવવાની પ્રવૃત્તિઓમાં ભાગ લેશે.

જેલ નંબર 4માં મંગળવારે આ બંને એકમનું ઉદ્ઘાટન જેલના મહાનિર્દેશક વિમલા મહેરાએ કર્યું. જેલ નંબર 4માં હાલ 2500 કેદીઓ છે. તિહાડની બધી જ જેલોમાં મળીને અંદાજે 12000 કેદીઓ છે.