લોકશાહી મુદ્દે ચર્ચામાં US નું ચીનને આમંત્રણ નહીં, તાઈવાનને બોલાવતા તણાવ વધી શકે!

અમેરિકાએ લોકશાહી પર ચર્ચા કરવા માટે 9 અને 10 ડિસેમ્બરે વર્ચ્યુઅલ સમિટનું આયોજન કર્યું છે. આમાં અમેરિકાએ કુલ 110 દેશોને આમંત્રણ આપ્યું છે, જેમાં ભારત પણ સામેલ છે. પરંતુ તેણે ચીનને આ યાદીમાંથી બહાર રાખ્યું છે, જ્યારે તાઈવાનને આમંત્રણ આપવામાં આવ્યું છે. જેના કારણે આગામી દિવસોમાં અમેરિકા અને ચીન વચ્ચે તણાવ વધી શકે છે. અમેરિકાના વિદેશ મંત્રાલય દ્વારા મંગળવારે જાહેર કરાયેલી યાદીમાંથી ચીન ઉપરાંત તુર્કીને પણ બાકાત રાખવામાં આવ્યું છે, જે અમેરિકા સાથે નાટો સંગઠનનું સભ્ય પણ છે. દક્ષિણ એશિયાની વાત કરીએ તો અમેરિકા દ્વારા પાકિસ્તાનને આમંત્રણ આપવામાં આવ્યું છે, પરંતુ અફઘાનિસ્તાન, બાંગ્લાદેશ અને શ્રીલંકાને યાદીમાંથી બહાર રાખવામાં આવ્યા છે. આ યાદી વિદેશ મંત્રાલયની વેબસાઈટ પર જાહેર કરવામાં આવી છે.

આટલું જ નહીં મધ્ય પૂર્વના દેશોની વાત કરવામાં આવે તો ઈરાનને બાકાત રાખવામાં આવ્યું છે, જ્યારે ઈરાક અને ઈઝરાયેલને ચર્ચા માટે આમંત્રણ આપવામાં આવ્યું છે. એટલું જ નહીં અમેરિકાએ પોતાના અરબ સહયોગી ઇજિપ્ત, સાઉદી અરેબિયા, જોર્ડન, કતાર અને UAEને પણ આ યાદીમાં સામેલ કર્યા નથી. જો બાઈડન વહીવટીતંત્રે બ્રાઝિલને આમંત્રણ આપ્યું છે, જેના રાષ્ટ્રપતિ જેયર બોલ્સોનારોની તેના નિર્ણયો માટે ઘણી વખત ટીકા કરવામાં આવી છે. તેને ડોનાલ્ડ ટ્રમ્પના સમર્થક માનવામાં આવે છે. અમેરિકાએ યુરોપમાંથી પણ ઘણા દેશો છોડી દીધા છે. હંગેરીને અહીં આમંત્રણ મળ્યું નથી, જ્યારે પોલેન્ડનો સમાવેશ કરવામાં આવ્યો છે.

આફ્રિકન દેશોની વાત કરીએ તો કોંગો, દક્ષિણ આફ્રિકા, નાઈજીરિયા અને નાઈજરને પણ આ યાદીમાં સામેલ કરવામાં આવ્યા છે. વ્હાઇટ હાઉસ દ્વારા આ વર્ષે ઓગસ્ટમાં જ આ સમિટનું આયોજન કરવાની જાહેરાત કરવામાં આવી હતી. આ સમિટના આયોજનની ત્રણ મુખ્ય થીમ રાખવામાં આવી છે, સરમુખત્યારશાહી સામે સંઘર્ષ, ભ્રષ્ટાચાર સામે લડત અને માનવ અધિકારોનું સન્માન. અમેરિકા તરફથી ભારત અને તાઈવાનને આમંત્રિત કરવા અને ચીનને બહાર રાખવા પર ડ્રેગન તરફથી હજુ સુધી કોઈ પ્રતિક્રિયા આપવામાં આવી નથી, પરંતુ આનાથી બંને દેશો વચ્ચેના સંબંધો બગડવાની અપેક્ષા છે.

English summary

US not inviting China to discuss democracy issue, calling on Taiwan could escalate tensions!