Weather Update: દિલ્લી સહિત આ રાજ્યોમાં વરસાદની સંભાવના, જાણો હવામાનની આગાહી
Weather Update: દેશની રાજધાની દિલ્હી સહિત દેશના વિવિધ રાજ્યોમાં હવામાનમાં પલટો જોવા મળી રહ્યો છે. એપ્રિલ મહિનો લગભગ અડધાથી વધુ પસાર થઈ ગયો છે પરંતુ સારી વાત એ છે કે આકરી ગરમી હજુ શરૂ થઈ નથી, જેના કારણે લોકો રાહતમાં છે. જો કે હવામાન વિભાગે આ સપ્તાહના અંતમાં દિલ્હીમાં હળવો વરસાદ થવાની સંભાવના વ્યક્ત કરી છે.
હવામાન વિભાગે કહ્યું છે કે વેસ્ટર્ન ડિસ્ટર્બન્સના કારણે આ સપ્તાહના અંતમાં દિલ્હીમાં વરસાદ પડી શકે છે. આ સાથે સમગ્ર એપ્રિલ મહિનામાં હીટવેવની શક્યતા પણ નકારી કાઢવામાં આવી છે. વરસાદને કારણે લોકોને ગરમીમાંથી રાહત મળશે અને તાપમાન પણ સામાન્ય રહેવાની આશા છે.
હવામાન વિભાગે કહ્યું છે કે 18થી 20 એપ્રિલ સુધી ગાજવીજ સાથે વરસાદ પડી શકે છે. આ સમયગાળા દરમિયાન જોરદાર પવન પણ ફૂંકાઈ શકે છે. શનિ-રવિના વરસાદ બાદ દિલ્હીમાં તાપમાનનો પારો અમુક અંશે વધવાની શક્યતા છે. હાલમાં આ સપ્તાહનો અંત લોકો માટે આનંદદાયક છે.
દિલ્હીમાં તાપમાનના પારાને લઈને હવામાન વિભાગે કહ્યું છે કે આ સપ્તાહમાં મહત્તમ તાપમાન 34-37 ડિગ્રી સેલ્સિયસ રહી શકે છે. જ્યારે લઘુત્તમ તાપમાન 22 થી 23 ડિગ્રી સેલ્સિયસ વચ્ચે રહેવાની શક્યતા છે.
નોઈડાની વાત કરીએ તો 19 એપ્રિલે હળવો વરસાદ થઈ શકે છે. હવામાન વિભાગના જણાવ્યા અનુસાર આ અઠવાડિયે અહીં તાપમાન 37-38 ડિગ્રી સેલ્સિયસ સુધી રહી શકે છે. લઘુત્તમ તાપમાન 20-24 ડિગ્રી સેલ્સિયસ વચ્ચે રહેવાની શક્યતા છે.
હવામાન વિભાગે દિલ્હીની સાથે સાથે ઉત્તર પ્રદેશ, હરિયાણા, પંજાબ, રાજસ્થાનમાં પણ ગાજવીજ સાથે હળવા વરસાદની સંભાવના વ્યક્ત કરી છે. અહીં 18-20 એપ્રિલ વચ્ચે વરસાદ પડી શકે છે. આ સાથે જમ્મુ-કાશ્મીર, હિમાચલ પ્રદેશ અને ઉત્તરાખંડમાં 18-21 એપ્રિલ સુધી વરસાદ અને હિમવર્ષા થવાની સંભાવના છે.
જ્યારે ઓડિશા અને પશ્ચિમ બંગાળ સહિત પાંચ રાજ્યોમાં હીટ વેવની ચેતવણી જારી કરવામાં આવી છે. અહીં 19 એપ્રિલ સુધી હીટ વેવની સ્થિતિ યથાવત રહેશે. આંધ્રપ્રદેશ અને તેલંગાણામાં પણ હીટ વેવ એલર્ટ જાહેર કરવામાં આવ્યું છે. આ ઉપરાંત ગોવામાં પણ હીટ વેવની સ્થિતિની શક્યતા વ્યક્ત કરવામાં આવી છે.
Click it and Unblock the Notifications
Sign in with Google
