Rajkot : રાજકોટમાં હોટલના રૂમ કલાકના હિસાબે ભાડે નહીં મળે, પોલીસ એક્શનમાં
Rajkot : રાજકોટ પોલીસ શહેરની હોટલો પર વધુ કડક થઈ છે. પોલીસે હોટલ સંચાલકો સાથે બેઠક કરીને મહત્વની સૂચનાઓ આપી છે. આ સૂચનાઓ અનુસાર, કોઈ પણ યુવક-યુવતીને માત્ર બે કે ત્રણ કલાક માટે રૂમ ભાડે આપવા પર પ્રતિબંધ મૂકવામાં આવ્યો છે.
આ નિર્ણય ખાસ કરીને સ્થાનિક યુગલોને ધ્યાનમાં રાખીને લેવાયો છે, જેથી અનૈતિક પ્રવૃત્તિઓ અને સગીરાઓ સાથેના ગુનાઓ અટકાવી શકાય.
ડીસીપી રાકેશ દેસાઈએ મીડિયાને જણાવ્યું કે, જે વ્યક્તિઓ બહારગામથી આવે છે અને તેમને ખરેખર રોકાણની જરૂર છે તેમને રૂમ આપવામાં કોઈ વાંધો નથી. પરંતુ જો કોઈ સ્થાનિક યુવક કોઈ યુવતીને લઈને આવે તો તેને રૂમની શી જરૂર છે?
તેમણે જણાવ્યું કે આવા કિસ્સાઓમાં ઘણીવાર સગીરાઓને હોટલના રૂમમાં લઈ જઈને તેમની સાથે અઘટિત ઘટનાઓ થતી હોય છે.
પોલીસે હોટલ સંચાલકોને યુવક-યુવતીઓની ઓળખ ચકાસવા માટે પણ કડક સૂચનો આપ્યા છે. જો કોઈ યુવતી મોઢા પર રૂમાલ કે ચુંદડી બાંધીને આવે તો તેને ચહેરો ખુલ્લો કરીને ઓળખ આપવી પડશે.
આ ઉપરાંત યુવતી સાથે આવેલા યુવકના આધારકાર્ડના ફોટો અને તેના ચહેરાનો મેળ ખાતો હોવો ફરજિયાત છે, જેથી કોઈ પણ પ્રકારની ખોટી ઓળખ રજૂ ન કરી શકાય.
આ પગલાંનો મુખ્ય ઉદ્દેશ્ય શહેરમાં સુરક્ષા જાળવવાનો અને કાયદાનું પાલન કરાવવાનો છે. ટૂંકા ગાળાના ભાડાથી ચાલતી ગેરકાયદેસર પ્રવૃત્તિઓ પર લગામ લગાવવા માટે આ નિર્ણય ખૂબ જ મહત્વપૂર્ણ સાબિત થઈ શકે છે.
Click it and Unblock the Notifications
Sign in with Google
