સુરત એરપોર્ટનો નવો રેકોર્ડ: જાન્યુઆરીમાં મુસાફરોનો આંકડો 1.71 લાખને પાર, આંતરરાષ્ટ્રીય ટ્રાફિકમાં પણ વધારો
Surat News: ડાયમંડ અને સિલ્ક સિટી તરીકે વિશ્વવિખ્યાત સુરત હવે ઉડ્ડયન ક્ષેત્રે પણ નવા શિખરો સર કરી રહ્યું છે. સુરત ઇન્ટરનેશનલ એરપોર્ટે જાન્યુઆરી મહિનામાં પેસેન્જર ટ્રાફિકના તમામ જૂના રેકોર્ડ તોડીને એક નવો ઇતિહાસ રચ્યો છે. છેલ્લા એક મહિનામાં કુલ 1,71,580 મુસાફરોએ સુરત એરપોર્ટ પરથી અવર-જવર કરી છે, જે અત્યાર સુધીનો સૌથી ઊંચો માસિક આંકડો છે.
ડોમેસ્ટિક અને ઇન્ટરનેશનલ પેસેન્જરોની વિગત
સુરતના ઝડપી ઔદ્યોગિક વિકાસ અને વધતી જતી કનેક્ટિવિટીને કારણે હવાઈ મુસાફરોની સંખ્યામાં સતત વધારો થઈ રહ્યો છે. જાન્યુઆરી મહિનાના આંકડાઓ પર નજર કરીએ તો:
- કુલ મુસાફરો: 1,71,580
- આંતરરાષ્ટ્રીય મુસાફરો: 23,660
- ડોમેસ્ટિક (સ્થાનિક) મુસાફરો: 1,47,920
- કુલ ફ્લાઇટ મૂવમેન્ટ: 1,447 ફ્લાઇટ્સ
કાર્ગો ક્ષેત્રે પણ સુરતનો દબદબો
માત્ર મુસાફરો જ નહીં, પણ વ્યાપારિક દૃષ્ટિએ પણ સુરત એરપોર્ટ ધમધમી રહ્યું છે. જાન્યુઆરી મહિના દરમિયાન કુલ 664.10 ટન કાર્ગો બુકિંગ કરવામાં આવ્યું હતું, જે સુરતના ટેક્સટાઇલ અને ડાયમંડ ઉદ્યોગની મજબૂત પકડ દર્શાવે છે.
સેલિબ્રિટીઝના આગમનથી ટ્રાફિક વધ્યો
જાન્યુઆરી મહિનામાં સુરતમાં આયોજિત વિવિધ ક્રિકેટ સ્પર્ધાઓ અને સામાજિક કાર્યક્રમોને કારણે બોલિવૂડ અને સાઉથ ફિલ્મ ઇન્ડસ્ટ્રીના દિગ્ગજોનો જમાવડો જોવા મળ્યો હતો. અમિતાભ બચ્ચન, સલમાન ખાન, અજય દેવગણ, સૈફ અલી ખાન અને કરીના કપૂર જેવા સુપરસ્ટાર્સની અવર-જવરને કારણે પણ એરપોર્ટ પર પેસેન્જર મૂવમેન્ટમાં મોટો ઉછાળો જોવા મળ્યો હતો.
આગામી સમયમાં ટ્રાફિક હજુ વધશે
હાલમાં સુરતથી મર્યાદિત શહેરો માટે ફ્લાઇટ્સ ઉપલબ્ધ છે, પરંતુ એરપોર્ટ ઓથોરિટી દ્વારા આગામી દિવસોમાં અન્ય મોટા શહેરો સાથે સીધી કનેક્ટિવિટી વધારવાના પ્રયાસો તેજ કરવામાં આવ્યા છે. નવી ફ્લાઇટ્સ શરૂ થતાની સાથે જ સુરત એરપોર્ટ પર પેસેન્જર ટ્રાફિકના આંકડાઓ હજુ પણ નવી ઊંચાઈએ પહોંચશે તેવી શક્યતા છે.
Click it and Unblock the Notifications
Sign in with Google
