ભારતીય કઠપૂતળીઓ સાઇબિરિયા પપેટ મહોત્સવમાં અત્યંત લોકપ્રિય

Updated: Saturday, May 25, 2013, 15:33 [IST]

સાઇબિરિયાના ઓમસ્ક શહેરમાં ગત સપ્તાહે આંતરરાષ્ટ્રીય પપેટ મહોત્સવ યોજાઇ ગયો. આ મહોત્સવમાં ભારતીય પપેટ કઠપૂતળી અને ચીનની કઠપૂતળીઓ સહિત દુનિયાના 13 કઠપૂતળી થિયેટરોએ ભાગ લીધો હતો. આ અંગે રેડિયો રૂસ દ્વારા આપવામાં આવેલા અહેવાલ અનુસાર સમગ્ર મહોત્સવ દરમિયાન ભારતીય કઠપૂતળીઓની રજૂઆતે ધૂમ મચાવી હતી. ભારતીય પપેટ આમંત્રિતોમાં લોકપ્રિય બની હતી.

ભારતના પરંપરાગત કઠપૂતળી થિયેટર 'અનારકલી' અહીં આવ્યું હતું. આ થિયેટરના તમામ અભિનેતા એક જ પરિવારના સભ્યો છે. આ પરિવાર છેલ્લી આઠ પેઢીઓથી કઠપૂતળીનો ખેલ બતાવી રહ્યો છે. ભારત અને ચીનની કઠપૂતળીના ખેલ દરેક દર્શકો જોવા માટે ઉતાવળા હતા. કારણ કે રાજસ્થાન જઇને કઠપૂતળીના અસલી નાચ અને ખેલને જોવાની સાનુકૂળતા દરેક વ્યક્તિ પાસે હોતી નથી.

શાંધાઇ કઠપૂતળી થિયેટરની ખાસ બાબત એ રહી કે તેણે એક રશિયન લોક કથા 'બુરાતિના અને સોનાની ચાવી'ને આધારે પોતાનો કઠપૂતળી તમાશો તૈયાર કર્યો હતો. એવી જ રીતે ચીનના કલાકારોએ રશિયનોને રુસી ભાષામાં કઠપૂતળીનો ખેલ દર્શાવીને અનોખી ભેટ આપી હતી. આ માટે કલાકારોએ ખાસ રુસી ભાષા શીખી હતી. આજકાલ કઠપૂતળી થિયેટરમાં દર્શકો શેક્સપીયરના નાટક ભજવાતા પણ જોઇ શકે છે. આજની આધુનિક સમસ્યાઓની રજૂઆત પણ કઠપૂતળીના માધ્યમથી ચોટદાર રીતે કરવામાં આવે છે.