ઈઝરાયેલ-હમાસ યુદ્ધ વચ્ચે મેકડોનાલ્ડ્સ બહિષ્કાર, જાણો કેમ?

By Desk

Published: Sunday, October 15, 2023, 20:57 [IST]

મેકડોનાલ્ડ્સ આ દિવસોમાં બહિષ્કારનો સામનો કરી રહી છે. મેકડોનાલ્ડ્સની ઇઝરાયેલની ફ્રેન્ચાઇઝીએ ઇન્સ્ટાગ્રામ પર હોસ્પિટલો અને ઇઝરાયેલી સૈનિકોને મફત ભોજન આપવાની જાહેરાત બાદ આ બહિષ્કાર શરૂ થયો છે.

આ ફ્રેન્ચાઇઝીએ તેના સોશિયલ મીડિયા એકાઉન્ટ પર જાહેરાત કરી હતી કે તેણે યુદ્ધ વચ્ચે ઇઝરાયેલી સૈનિકોને અત્યાર સુધીમાં 4,000 ફૂડ પેકેટ્સ પહોંચાડ્યા છે. ઇઝરાયલી સૈનિકો માટે અન્ય ખાદ્ય ચીજો પર 50 ટકા ડિસ્કાઉન્ટની પણ જાહેરાત કરવામાં આવી છે.

મેકડોનાલ્ડ્સની ઇઝરાયેલી ફ્રેન્ચાઇઝીએ લખ્યું કે, ગઇકાલે જ અમે હોસ્પિટલો અને લશ્કરી એકમોને 4,000 ફૂડ પેકેટ દાનમાં આપ્યા છે. આ રેસ્ટોરન્ટની મુલાકાત લેતા સૈનિકો માટે ડિસ્કાઉન્ટ છે.

હવે સોશિયલ મીડિયા સાઇટ X પર ઘણા લોકોએ અમેરિકન ચેઇન દ્વારા લેવામાં આવેલા પગલાનો વિરોધ કર્યો છે.

જણાવી દઈએ કે, મેકડોનાલ્ડના ઈઝરાયેલના ઈન્સ્ટાગ્રામ અને એક્સ પેજને હવે નિષ્ક્રિય કરી દેવામાં આવ્યા છે. પાકિસ્તાનમાં, મેકડોનાલ્ડ્સ ઇઝરાયેલની જાહેરાત પર શુક્રવારે હેશટેગ #BoycottMcDonalds ટ્રેન્ડ થયો હતો.

પાકિસ્તાન તહરીક-એ-ઈન્સાફના રાજનેતાએ X એકાઉન્ટ પર પોસ્ટ કરીને પૂછ્યું કે શું પાકિસ્તાનીઓ હજુ પણ મેકડોનાલ્ડ્સમાંથી ખાવાનું પસંદ કરશે?

લેબનોનમાં પ્રો-પેલેસ્ટિનિયન જૂથોએ ઇઝરાયેલમાં લશ્કરી જાહેરાતને લઈને સિડોનમાં મેકડોનાલ્ડ્સના આઉટલેટ પર હુમલો કર્યો હોવાના પણ અહેવાલ છે. મેકડોનાલ્ડ્સ લેબનોને એક નિવેદનમાં જણાવ્યું કે, તે અન્ય દેશોમાં ફ્રેન્ચાઇઝીઓ દ્વારા અપનાવવામાં આવેલી સ્થિતિને માન્ય કરતું નથી.

Published On October 15, 2023