ચેતેશ્વર પૂજારાને ત્યાં આવી નાનકડી પરી, પરિવારમાં છવાઇ ખુશી

ક્રિકેટર ચેતેશ્વર પૂજારાની પત્ની પૂજાએ દિકરીને જન્મ આપ્યો છે. આ સારા સમાચાર જાણ્યા પછી ચેતેશ્વર પણ ખાસ દિલ્હીથી દિકરીને મળવા નીકળ્યો છે. ત્યારે જાણો આ સમાચાર અંગે વધુ ખબર અહીં.

Updated: Friday, February 23, 2018, 12:36 [IST]

ભારતીય ક્રિકેટના જાણીતા ક્રિકેટર ચેતેશ્વર પૂજારાને ત્યાં દિકરી અવતરી છે. જેના કારણે હાલ તેમનો સમગ્ર પરિવાર ખુશી મનાવી રહ્યો છે. મીડિયા રિપોર્ટ મુજબ પૂજારાની પત્ની પૂજા ડાબરીએ ગુરવારે એટલે કે 22 ફેબ્રુઆરી 2018ના રોજ પુત્રીને જન્મ આપ્યો છે. તમને જણાવી દઇએ કે ભારતને દક્ષિણ આફ્રિકા પછી હવે ઇંગ્લેડના પ્રવાસ પર છે. જ્યાં તેમને ઇંગ્લેડ સાથે ટેસ્ટ સીરિઝ રમવાની છે. આ વાતને ધ્યાનમાં લઇને ચેતેશ્વર પૂજારા હાલ દિલ્હીમાં વિજય હજારે ટ્રોફી રમવામાં વ્યસ્ત છે. પણ તે જલ્દી જ પોતાની લાડકીને જોવા માટે રાજકોટ જશે. નોંધનીય છે કે પાંચ વર્ષના લગ્ન જીવન પછી ચેતેશ્વર અને પૂજાને ત્યાં પહેલા સંતાન સ્વરૂપે દિકરી આવી છે. ઉલ્લેખનીય છે કે નવા વર્ષની શરૂઆતમાં જ ચેતેશ્વરે એક ફોટો મૂકી તેના ફેન્સને જણાવ્યું હતું કે આ વર્ષે તે એક નાના બાળકની આશા રાખી રહ્યા છે.

અને હવે જ્યારે તેમને ત્યાં એક નાનકડી પરીએ જન્મ લીધો છે ત્યારે ચેતેશ્વરના ફેન્સે પણ આ વાત જાણીને ખુશ થઇ ગયા છે. અને ચેતેશ્વર અને તેમના પરિવાર આ માટે હાલે શુભેચ્છાઓ પણ ફેન્સ તરફથી મળી રહી છે. ઉલ્લેખનીય છે કે ચેતેશ્વર અને પૂજાના લગ્ન 13 ફેબ્રુઆરી 2013ના રોજ રાજકોટમાં થયા હતા. પૂજા મેનેજમેન્ટ ગ્રેજ્યુએટ છે. અને તે અવાર નવાર પતિને ચીયર કરતી સ્ટેડિયમમાં જોવા મળે છે. ત્યારે ચેતેશ્વરને ત્યાં દિકરીના જન્મ થતા તેના પિતાએ મીડિયા સાથેની વાતચીતમાં માં પુત્રી બંન્નેની તબિયત સારી હોવાની અને લક્ષ્મી આવવાથી ઘરમાં ખુશી છવાઇ ગઇ હોવાની વાત જણાવી હતી.