Dhoniએ નહી આ ખેલાડીએ ઘડ્યુ હતુ યુવરાજસિંહની કારકિર્દી ખતમ કરવાનું કાવતરું, રોબિન ઉથપ્પાએ ખોલ્યુ રહસ્ય

ભૂતપૂર્વ ભારતીય કેપ્ટન વિરાટ કોહલી જ્યારે પહેલી વાર ભારતીય ટીમમાં આવ્યા ત્યારે તેમણે યુવરાજ સિંહને પોતાનો માર્ગદર્શક માન્યો હતો. કોહલીએ જ રોયલ ચેલેન્જર્સ બેંગ્લોર (RCB) ને IPL હરાજીમાં યુવરાજને પસંદ કરવા માટે પ્રોત્સાહિત કર્યા હતા. પરંતુ હવે વિરાટ કોહલી પર યુવરાજ સિંહની કારકિર્દી બરબાદ કરવાનો આરોપ લાગી રહ્યો છે.

યુવરાજના પિતા યોગરાજ સિંહ માને છે કે તેમના પુત્રની કારકિર્દી વહેલા ખતમ થવા માટે એમએસ ધોની જવાબદાર હતો, પરંતુ પંજાબના ડાબોડી બેટ્સમેનની વહેલી નિવૃત્તિમાં કોહલીનો મોટો હાથ હતો. આ વાતનો ખુલાસો એમએસ ધોનીના ભૂતપૂર્વ ચેન્નાઈ સુપર કિંગ્સ (CSK) સાથી ખેલાડી રોબિન ઉથપ્પાએ તાજેતરના એક ઇન્ટરવ્યુમાં કર્યો હતો.

કેન્સર સામે લડીને કમબેક કર્યું

યુવરાજે 2007ના T20 વર્લ્ડ કપ અને 2011ના ODI વર્લ્ડ કપ બંનેમાં ભારતની જીતમાં મહત્વપૂર્ણ ભૂમિકા ભજવી હતી. જોકે, ટીમને બીજા વર્લ્ડ કપ ટાઇટલ અપાવ્યાના થોડા સમય પછી, યુવરાજને કેન્સર હોવાનું નિદાન થયું. આ જીવલેણ પડકાર છતાં તેણે બીમારી પર કાબુ મેળવ્યો અને ભારતીય ટીમમાં શાનદાર વાપસી કરી. કમનસીબે, તેણે પોતાના માટે બનાવેલ ફોર્મ શોધવા માટે સંઘર્ષ કર્યો અને સતત અસંગત પ્રદર્શન બાદ 2017 ચેમ્પિયન્સ ટ્રોફી પછી તેને આખરે ટીમમાંથી બહાર કરી દેવામાં આવ્યો.

વર્લ્ડકપ જીતાડવામાં યુવરાજસિંહની મોટી ભૂમિકા

યુવરાજના કેન્સર સામેના યુદ્ધ અને ક્રિકેટમાં તેના પુનરાગમન વિશે ખુલીને વાત કરતા ભારત અને ચેન્નાઈ સુપર કિંગ્સના ભૂતપૂર્વ સ્ટાર રોબિન ઉથપ્પાએ પરોક્ષ રીતે વિરાટ કોહલીના નેતૃત્વને યુવરાજની ટીમમાંથી બહાર થવાના એક કારણ તરીકે ગણાવ્યું. ઉથપ્પાએ એવા ખેલાડી પ્રત્યે આદર દર્શાવવાના મહત્વ પર ભાર મૂક્યો જેણે ઘણી બધી વ્યક્તિગત મુશ્કેલીઓનો સામનો કર્યો અને ભારત માટે અનેક વર્લ્ડ કપ જીત મેળવવામાં મુખ્ય ભૂમિકા ભજવી.

વિરાટ કોહલી હતો ટીમનો કેપ્ટન

ઉથપ્પાએ લલ્લાન્ટોપ સાથેની એક મુલાકાતમાં જણાવ્યું હતું કે યુવી કેન્સર સામે લડી રહ્યો હતો અને રાષ્ટ્રીય ટીમમાં વાપસી કરવાનો પ્રયાસ કરી રહ્યો હતો. આ એ જ ખેલાડી છે જેણે બે વર્લ્ડ કપ જીતવામાં મદદ કરી, ફક્ત ટીમના ભાગ રૂપે જ નહીં, પણ એક ઓલરાઉન્ડર તરીકે પણ જેણે બેટ અને બોલ બંનેથી છાપ છોડી. છતાં જ્યારે તેના જેવો કોઈ વ્યક્તિ જેણે ઘણું બધું સહન કર્યું છે, તે ટીમમાં પાછા આવવા માટે સંઘર્ષ કરે છે, ત્યારે કેપ્ટન કહે છે કે તેમના ફેફસાંની ક્ષમતા ઘટી ગઈ છે. તમને જણાવી દઈએ કે જ્યારે યુવી ટીમમાં આવવાનો પ્રયાસ કરી રહ્યો હતો ત્યારે ટીમનો કેપ્ટન વિરાટ કોહલી હતો.