IPL 2026 Auction : સરફરાઝ ખાનને મોટો ઝટકો, ઓક્શનમાં અનસોલ્ડ રહ્યો

અબુ ધાબીમાં યોજાયેલી IPL 2026ની મિની ઑક્શન મુંબઈના બેટ્સમેન સરફરાઝ ખાન માટે મોટી નિરાશા લઈને આવી છે. ઘરેલું ક્રિકેટમાં ઉત્કૃષ્ટ પ્રદર્શન કરવા છતાં 75 લાખની બેઝ પ્રાઈસ ધરાવતા સરફરાઝને કોઈ પણ ફ્રેન્ચાઈઝીએ ખરીદવામાં રસ દાખવ્યો નહીં અને તે અનસોલ્ડ રહ્યો.

આ નિર્ણય ખાસ કરીને ત્યારે આશ્ચર્યજનક બન્યો જ્યારે ઑક્શનના આગલા જ દિવસે સરફરાઝે સૈયદ મુશ્તાક અલી ટ્રોફીમાં માત્ર 22 બોલમાં 73 રનની ધમાકેદાર ઇનિંગ રમી હતી. તેમ છતાં ટીમ માલિકો અને મેનેજરો તેના આ દમદાર દેખાવથી પ્રભાવિત ન થયા હોવાનું સ્પષ્ટપણે જણાઈ રહ્યું છે.

સરફરાઝ ખાન ઘરેલું ક્રિકેટમાં સતત સારો દેખાવ કરી રહ્યો છે અને છેલ્લા એક વર્ષથી તેમનું પ્રદર્શન ઉત્કૃષ્ટ રહ્યું છે. તેણે સૈયદ મુશ્તાક અલી ટ્રોફીમાં 7 મેચમાં 329 રન ફટકાર્યા, જેમાં સતત બે અડધી સદીનો પણ સમાવેશ થાય છે.

હરિયાણા સામે 64 રનની તેની ઇનિંગે સૈયદ મુશ્તાક અલી ટ્રોફીના ઇતિહાસમાં 235 રનના સૌથી મોટા રન ચેઝમાં મહત્વપૂર્ણ ભૂમિકા ભજવી હતી. જો કે, આ પ્રદર્શનનો ફાયદો તેને IPLમાં મળ્યો નથી અને ભારતીય ટીમમાં સ્થાન મેળવવાની તેની આશા પણ હજુ અધૂરી છે.

અગાઉ એવી અટકળો હતી કે IPLમાં સારો દેખાવ કરવાથી ભારતીય ટીમમાં તેના પુનરાગમનના દરવાજા ખુલી શકે છે. હવે જોવું રહ્યું કે એક્સિલરેટર રાઉન્ડમાં તેને કોઈ તક મળે છે કે કેમ.

English summary

Sarfaraz Khan, despite a stellar Saeed Mushtaq Ali Trophy showing, was not bought at the IPL 2026 mini auction in Abu Dhabi. The domestic form has not translated into IPL opportunities, leaving questions about his Indian team prospects and future opportunities in the league.