90 રૂપિયા કિલો ડુંગળી, નિકાસ પર લાગી શકે છે રોક

| Updated: Wednesday, October 23, 2013, 12:47 [IST]

નવી દિલ્હી, 23 ઓક્ટોબર: દિવસેને દિવસે ડુંગળીમાં થઇ રહેલા ભાવ વધારાના કારણે ડુંગળી લોકોને મોંઘેરા આંસુએ રડાવી રહી છે. સરકાર કિંમતો પર નિયંત્રણ માટે ડુંગળીની નિકાસ પર પ્રતિબંધ લાદી શકે છે. આપૂર્તિની સમસ્યાના કારણે રાષ્ટ્રીય રાજધાનીમાં ડુંગળીના ભાવ વધીને 80થી 90 રૂપિયા કિલોગ્રામ પર પહોંચી ગયા છે.

દિલ્હી જ નહી, દેશના અન્ય ભાગોમાં પણ ડુંગળીની ઊંચી કિંમતો ગ્રાહકોને રડાવી રહી છે. દેશના પ્રમુખ શહેરોના ખુદરા બજારોમાં આ સમયે ડુંગળી 60થી 80 રૂપિયા કિલોના ભાવે વેચાઇ રહી છે. મહારાષ્ટ્ર સહિત અન્ય પ્રમુખ ઉત્પાદક ક્ષેત્રમાં કમોસમી વરસાદના કારણે ખરીફ પાકને નુકસાન પહોંચ્યું છે જેના કારણે દેશમાં ડુંગળીનો પુરવઠો ઘટ્યો છે.

એક વરિષ્ઠ સરકારી અધિકારીએ જણાવ્યું કે 'ડુંગળીની કિંમતોમાં ખૂબ તેજી આવી છે. અમે નિકાસ પર પ્રતિબંધ લાદવા પર વિચાર કરી રહ્યા છીએ, કારણ કે ન્યૂનતમ નિકાસ મૂલ્ય(એમઇપી)વધારવાનો અન્ય કોઇ વિકલ્પ નથી.' અધિકારીએ જણાવ્યું કે હાલના સમયમાં એમઇપીમાં વધારા બાદ ડુંગળીની નિકાસ ઘટી છે, પરંતુ આપૂર્તિની સમસ્યાને લીધે તેના ભાવમાં પણ વધારો થયો છે. કેટલાક મહત્વપૂર્ણ ઉત્પાદક રાજ્યોમાં કમોસમી વરસાદથી પાક ખરાબ થવાથી સ્થિતિ વધારે ખરાબ થઇ છે.

ડુંગળીના ભાવોમાં ઝડપી ભાવ વધારાને ધ્યાનમાં રાખતા સરકાર તેની નિકાસ પર પ્રતિબંધ લગાવવા પર વિચાર કરી રહી છે. અત્રે ઉલ્લેખનીય છે કે દેશમાં તહેવારો આવી રહ્યા છે અને ડુંગળીનો ભાવ પેટ્રોલ કરતા પણ વધી ગયા છે. અધુરામાં પૂરું દેશના પાંચ રાજ્યોમાં વિધાનસભાની ચૂંટણીઓ આવી રહી છે જેના પગલે યુપીએ સરકાર ચિંતામાં આવી ગઇ છે. જેના પગલે ખાદ્ય પ્રધાન કે.વી થોમસે 25મી ઓક્ટોબરે દરેક રાજ્યોની તાત્કાલિક બેઠક બોલાવી છે.

દેશના વિવિધ શહેરોમાં સપ્ટેમ્બર અને ઓક્ટોબર મહિનાના ડુંગળીના ભાવ આ પ્રમાણે છે.