બિહારના નાલંદામાં શીતળા માતા મંદિરમાં નાસભાગ, 8 મહિલાઓના મોત

By Desk

Updated: Tuesday, March 31, 2026, 13:56 [IST]

બિહારના નાલંદામાં આવેલા સુપ્રસિદ્ધ શીતલા માતા મંદિરમાં 31 માર્ચ, 2026ના રોજ પૂજા દરમિયાન ભારે નાસભાગ મચી હતી. ચૈત્ર માસના છેલ્લા મંગળવારે દર્શન માટે ઉમટેલી ભીડમાં દબાઈ જવાથી 8 મહિલા શ્રદ્ધાળુઓએ જીવ ગુમાવ્યા છે.

આ કરુણ ઘટનામાં 12થી વધુ લોકો ગંભીર રીતે ઘાયલ થયા હોવાના અહેવાલ મળ્યા છે, જેમને સારવાર માટે હોસ્પિટલ ખસેડાયા છે. શીતલા અષ્ટમીના પવિત્ર દિવસે હજારોની સંખ્યામાં ભક્તો ઉમટી પડતા અચાનક આ અફરાતફરી સર્જાઈ હોવાનું જાણવા મળ્યું છે.

અહેવાલો મુજબ, મંદિરમાં દર્શન માટે લાગેલી લાંબી કતારમાં આગળ નીકળવાની હોડમાં ધક્કામુક્કી શરૂ થઈ અને સ્થિતિ બેકાબૂ બની હતી. આ નાસભાગમાં વૃદ્ધ મહિલાઓ અને બાળકો સૌથી વધુ ભોગ બન્યા હતા, જેમના મૃત્યુથી અરેરાટી વ્યાપી ગઈ છે.

જિલ્લા પ્રશાસને અત્યાર સુધી 8 લોકોના મોતની સત્તાવાર પુષ્ટિ કરી છે, જેમાં રીતા દેવી અને રેખા દેવીની ઓળખ થઈ છે. બાકીના મૃતકોની ઓળખ કરવાની તજવીજ હાલ પોલીસ દ્વારા યુદ્ધના ધોરણે હાથ ધરવામાં આવી રહી છે.

ઘટનાની જાણ થતા જ મુખ્યમંત્રી નીતિશ કુમારે ઘેરા શોકની લાગણી વ્યક્ત કરી અને મૃતકોના પરિવારો માટે આર્થિક સહાયની જાહેરાત કરી છે. દરેક મૃતક આશ્રિતને કુલ 6 લાખ રૂપિયાની સહાય આપવાની જાહેરાત સરકાર દ્વારા કરવામાં આવી છે.

મુખ્યમંત્રીએ ડિઝાસ્ટર મેનેજમેન્ટ અને રાહત કોષમાંથી તાત્કાલિક સહાય આપવા તેમજ ઘાયલોની મફત સારવાર કરવાના આદેશો આપ્યા છે. નાયબ મુખ્યમંત્રી સમ્રાટ ચૌધરીએ પણ આ ઘટનાને હૃદયદ્રાવક ગણાવીને પીડિતો પ્રત્યે પોતાની સંવેદના વ્યક્ત કરી છે.

બીજી તરફ, સ્થાનિક લોકોએ પોલીસ અને પ્રશાસન પર સુરક્ષા વ્યવસ્થામાં ગંભીર બેદરકારી દાખવ્યાના આક્ષેપો કરીને ભારે આક્રોશ વ્યક્ત કર્યો છે. ભીડને જોતા પૂરતી બેરિકેડિંગ કે પોલીસ બંદોબસ્ત ન હોવાને કારણે આ દુર્ઘટના ઘટી હોવાનું લોકો માની રહ્યા છે.

ઉલ્લેખનીય છે કે, ચૈત્ર માસના અંતિમ મંગળવારે શીતલા માતાની પૂજાનું વિશેષ મહત્વ હોવાથી ગ્રામીણ વિસ્તારોમાંથી મોટી સંખ્યામાં મહિલાઓ આવી હતી. આસ્થાના આ પર્વમાં સર્જાયેલી હોનારતે સમગ્ર બિહારમાં શોકનું મોજું ફરી વળ્યું છે.