પરસેવો પાડવા તૈયાર થઈ જાવ, હવામાન વિભાગની હિટવેવની આગાહી

ગુજરાતમાં ઉનાળાની શરૂઆતમાં જ ગરમીએ પોતાનું રૌદ્ર સ્વરૂપ ધારણ કર્યું છે. રાજ્યના અનેક શહેરોમાં તાપમાનનો પારો સામાન્ય કરતા ઘણો ઊંચો નોંધાતા લોકો પરેશાન થઈ રહ્યા છે.

ભારતીય હવામાન વિભાગ (IMD) દ્વારા આગામી 9 અને 10 માર્ચ દરમિયાન રાજ્યમાં હીટવેવની આગાહી કરવામાં આવી છે. અમદાવાદ, સુરત અને વડોદરા જેવા મોટા શહેરો માટે ખાસ ચેતવણી જારી કરાઈ છે.

હવામાન વિભાગના જણાવ્યા અનુસાર, ખાસ કરીને અમદાવાદ અને ગાંધીનગર સહિત બનાસકાંઠામાં આકરો તાપ પડી શકે છે. સૌરાષ્ટ્રના રાજકોટ, અમરેલી અને કચ્છમાં પણ ગરમીના મોજાની અસર જોવા મળશે.

દરિયાકાંઠાના વિસ્તારોમાં 9 થી 11 માર્ચ દરમિયાન ભેજવાળું અને ગરમ વાતાવરણ રહેવાની શક્યતા છે. રવિવારે અમદાવાદમાં મહત્તમ તાપમાન 39.4°C નોંધાયું હતું, જે સામાન્ય કરતા ઘણું વધારે છે.

આગામી ત્રણ દિવસમાં મહત્તમ તાપમાનમાં હજુ પણ 2 થી 3 ડિગ્રીનો વધારો થઈ શકે છે. રાજકોટ અને સુરેન્દ્રનગરમાં પારો અત્યારથી જ 40°C ને પાર કરી ગયો હોવાનું જાણવા મળ્યું છે.

માર્ચ મહિનાની લાંબાગાળાની આગાહી મુજબ, આ વર્ષે ગુજરાતમાં સરેરાશ કરતા વધુ ગરમી પડી શકે છે. વહેલી શરૂ થયેલી આ ગરમીના કારણે લોકોએ અત્યારથી જ સાવચેતી રાખવી અનિવાર્ય બની છે.

English summary

The IMD warns of a heatwave across Gujarat on March 9 and 10, with Ahmedabad, Surat, Vadodara and coastal districts at heightened risk. Temperatures may rise by 2-3°C, potentially impacting health and daily activities. Coastal areas may remain hot and humid through March 11, with continued elevated daytime temperatures.