હાર્દિક પટેલ લડશે લોકસભા ચૂંટણી, જાણો કઈ સીટ પરથી?

Updated: Wednesday, February 6, 2019, 14:48 [IST]

પાટીદાર અનામત આંદોલન દ્વારા ગુજરાતના રાજકારણમાં પ્રવેશ કરનારો એક ચર્ચીત ચહેરો એટલે હાર્દિક પટેલ.. આ હાર્દિક પટેલ હવે લોકસભાની ચૂંટણી દ્વારા સીધો રાજકારણમાં સામેલ થઇ શકે છે. પાટીદારો માટે અનામતની માંગણી કરીને રાતોરાત લાઈમ લાઈટમાં આવી જનાર હાર્દિક પટેલ આગામી લોકસભા ચૂંટણીમાં ઝુકાવશે. યુપીમાં યોજાયેલી એક રેલીમાં પાટીદાર અનામત આંદોલન સમિતિના કન્વીનર હાર્દિક પટેલે ગુજરાતમાં આગામી લોકસભા ચૂંટણી લડવાની જાહેરાત કરી છે. જોકે, હાર્દિક પટેલ ક્યાંથી મેદાનમાં જંપલાવશે તેની કોઇ સપષ્ટ જાણકારી નથી. પરંતું, તે ગુજરાતમાં પાટીદાર પ્રભુત્વની બેઠક પર મેદાનમાં ઉતરશે તે સપષ્ટ છે.

હાર્દિક માટે મહેસાણા કે અમરેલી ?

હાર્દિક ગુજરાતમાં ક્યાંથી ચૂંટણી લડશે તેની પણ અટકળો રાજકીય વિશ્લેષકોમાં શરુ થઈ ગઈ છે. ગુજરાત 20 ટકા જેટલુ પાટીદાર પ્રભુત્વ ધરાવતું રાજ્ય છે. ગુજરાતમાં મહેસાણા અને અમરેલીની બેઠક હાર્દિક પટેલ માટે સેફ મનાય છે. આ પૈકીની કોઈ એક બેઠક પર હાર્દિક ચૂંટણી લડી શકે છે.હાર્દિક ચૂંટણી લડે તો તેના સમર્થનમાં કોંગ્રેસ પોતાનો ઉમેદવાર ના ઉભો રાખે તે પણ શક્ય છે. હાર્દિક ખાસ કરીને પાટીદાર પ્રભુત્વ ધરાવતી બેઠક પરથી ચૂંટણી લડે તેવી શક્યતા વધારે છે.

લાલજી પટેલ બનશે મુશ્કેલી ?

ઉત્તર ગુજરાતની મહેસાણા બેઠક પાટીદારોનો ગઢ ગણાય છે. જ્યાંથી હાર્દિકની ચૂંટણી લડવાની શક્યતા છે. પરંતું, ત્યાં સરદાર પટેલ સેવા દળના લાલજી પટેલ પણ હાર્દિક માટે મુશ્કેલીનુ કારણ બની શકે છે. લાલજી પટેલ પાટીદાર સમાજ પર મહેસાણા વિસ્તારમાં ભારે પ્રભુત્વ ધરાવે છે. હાર્દિક પટેલને લાલજી પટેલ મુશ્કેલી સર્જે તેવી શક્યતા છે. તેની સરખામણીએ સૌરાષ્ટ્રની અમરેલીની બેઠક વધારે સુરક્ષિત ગણાઇ શકે છે. કારણ કે અમરેલી વિરોધ પક્ષના નેતા પરેશ ધાનાનીનો ગઢ ગણાય છે. આ ઉપરાંત અમરેલીમાં 2017ની વિધાનસભા ચૂંટણીમાં તમામ બેઠક પર કોંગ્રેસનો વિજય પણ થયો છે.

કયા પક્ષ સાથે શરૂ કરશે રાજકીય ઇનિંગ

જોકે, હાર્દિક પટેલ ક્યાંથી મેદાનમાં ઉતરશે તેને લઇને પણ અટકળો છે તેમ, તે કયા પક્ષમાંથી મેદાનમાં જંપલાવશે તે પણ ક્યાસ લાગી રહ્યા છે. હાર્દિક અપક્ષ ઉમેદવાર તરીકે મેદાનમાં આવે તેવી એક અટકળ છે. જ્યાં, કોંગ્રેસ પોતાનો ઉમેદવાર ન ઉતારીને તેને સમર્થન કરે તેવી સંભાવના છે. તો, કોંગ્રેસના સત્તાવાર ઉમેદવાર તરીકે પણ ચૂંટણીમાં ઝુકાવી શકે છે. આ ઉપરાંત એનસીપીના ઉમેદવાર તરીકે મેદાનમાં આવે તેવી પણ એક શક્યતા છે. ત્યારે, હવે હાર્દિક પટેલ રાજકારણમાં જાહેર રીતે કયા પક્ષ સાથે પોતાની ઇનિંગ શરૂ કરશે તે સવાલ મુંજવતો રહેશે.