માડમ વિ. માડમઃ જામનગરમાં કાકાનો પડશે પંજો કે ભત્રીજીનો લહેરાશે ભગવો?

Published: Thursday, April 3, 2014, 15:32 [IST]

લોકસભા ચૂંટણી 2014 જેમ જેમ નજીક આવી રહી છે, દેશભરમાં ચૂંટણી માહોલ છવાઇ રહ્યો છે. ગુજરાતની વાત કરવામાં આવે તો, ગુજરાતના મુખ્યમંત્રી નરેન્દ્ર મોદી આ વખતે ભાજપના પીએમ પદના ઉમેદવાર હોવાથી ગુજરાત પર દેશના રાજકિય વિશ્લેષકોનું અને ચૂંટણી રસિકોનું વિશેષ ધ્યાન જોવા મળી રહ્યું છે. ગુજરાતમાં 26 બેઠકોમાંથી સૌથી વધારે બેઠકો પર કમળનો કબજો જમાવવા માટે મુખ્યમંત્રી એડી ચોટીનું જોર લગાવી રહ્યાં છે.

જે બેઠકો પર કોંગ્રેસના કદાવર નેતા અને સાંસદ ચૂંટાતા આવ્યા છે, એ બેઠકો પર ભાજપના મજબૂત નેતાઓ મુકીને તેમને બરોબરીની ટક્કર આપવાની યોજના ભાજપ દ્વારા બનાવી લેવામાં આવી છે, તો બીજી તરફ કોંગ્રેસનો ગઢ ગણાતા વિસ્તારોમાં ભાજપ દ્વારા કોંગ્રેસમાંથી આવેલા નેતાઓને ટિકિટ આપીને એ ગઢને ભાજપનો ગઢ બનાવવાની તૈયારીઓ પણ આદરી દેવામાં આવી છે. આજે વાત જ્યારે જામનગર બેઠકની કરવામાં આવી રહી છે, ત્યારે આ બેઠક આપ મેળે જ ખાસ બની ગઇ છે. એક તરફ આ બેઠક પરથી સતત બે વાર વિજેતા બનેલા વિક્રમ માડમને કોંગ્રેસ દ્વારા ટિકિટ આપવામાં આવી છે, તો બીજી તરફ ભાજપ દ્વારા વિક્રમ માડમનો ખેલ બગાડવા માટે તેમના ભત્રીજી અને ખંભાળિયાના ધારાસભ્ય પૂનમ માડમને ટિકિટ આપવામાં આવી છે.

જે પ્રકારનો દેશમાં માહોલ સર્જાયો છે અને ચારેકોર મોદીની લહેર જોવા મળી છે, ત્યારે જામનગરમાં વિક્રમ માડમને પૂનમ માડમ મજબૂત પડકાર આપશે તેમાં કંઇ કહીં શકાય નહીં, પરંતુ આ બેઠકમાં મુસ્લિમ મતો ભાજપની બાજી કદાચ બગાડી શકે છે. જો કે તમ છતાં ઇતિહાસમાં ડોકિયુ કરીએ તો આ બેઠક એક સમયે ભાજપની હતી અને આ બેઠક પર ભાજપના ચંદ્રેશ કોરડિયા સતત પાંચ ટર્મ સુધી ચૂંટાયા હતા. જામનગર બેઠક સાથે જાડાયેલી અન્ય માહિતી તસવીરો થકી એક નજર ફેરવીએ.

જામનગર બેઠક પરના ઉમેદવારો

કોંગ્રેસ તરફથી જામનગર બેઠક પર પોતાના સિટિંગ એમપી વિક્રમ માડમને ટિકિટ આપવામાં આવી છે, જેની સામે ભાજપ દ્વારા ખંભાળિયાના ધારસાભ્ય પૂનમ માડમને મેદાને ઉતાર્યા છે. નોંધનીય છે કે પૂનમ માડમ કોંગ્રેસમાંથી ભાજપમાં આવ્યા હતા અને ત્યારથી જ એ આશંકાઓ લગાવવામાં આવી રહી હતી કે વિક્રમ માડમ સામે તેમને લોકસભા ચૂંટણીમાં ઉતારવામાં આવશે. જેથી આ બેઠક પર ખરાખરીનો જંગ જામશે. આમ આદમી પાર્ટીની વાત કરવામાં આવે તો ‘આપ' દ્વારા રાજેન્દ્ર સિંહ ઝાલાને ટિકિટ આપવામાં આવી છે.

જ્ઞાતિ આધારિત મતો

આ બેઠક પર જ્ઞાતિ આધારિત મતોની વાત કરવામાં આવે તો મુસ્લિમો આ બેઠક પર નિર્ણાયક સાબિત થઇ શકે છે. આ બેઠક પર મુસ્લિમોના 11.81 ટકા મત, લેવા પટેલના 10.7, આહીરના 9.72, કડવા પટેલના 4.51, બ્રાહ્મણના 4.51, દલિતના 8.33, રાજપૂતના 8.33 મતો છે.